O‘zbekistonda lazer nurlantiruvchilaridan noqonuniy foydalanganlik uchun jazo joriy etildi
Portativ lazer nurlantiruvchilaridan noqonuniy foydalanish uchun jarima va musodara jazosi belgilandi.
O‘zbekistonda portativ lazerli nur tarqatgichlarining noqonuniy muomalasi uchun ma’muriy javobgarlik belgilandi. Bu haqda Adliya vazirligi ma’lum qildi.
Qonun bilan ayrim normativ-huquqiy hujjatlarga o‘zgartirish va qo‘shimchalar kiritilib, lazer qurilmalaridan noqonuniy foydalanish, ularni ishlab chiqarish, saqlash, tashish, olib kirish va olib chiqish bilan bog‘liq holatlar uchun jazo choralari joriy etildi.
Yangi tartibga ko‘ra, portativ lazerli nur tarqatgichlardan qonunga xilof ravishda foydalanish huquqbuzarlik ashyolarini musodara qilgan holda bazaviy hisoblash miqdorining 15 baravaridan 25 baravarigacha jarima solishga sabab bo‘ladi.
Shuningdek, ushbu qurilmalarni noqonuniy ishlab chiqarish, tayyorlash, saqlash, tashish, jo‘natish yoki O‘zbekiston hududidan olib chiqish holatlari uchun BHMning 15 baravaridan 30 baravarigacha jarima belgilanadi.
Portativ lazer qurilmalarini noqonuniy ravishda sotish yoki mamlakat hududiga olib kirish uchun esa huquqbuzarlik buyumlarini musodara qilgan holda BHMning 25 baravaridan 50 baravarigacha jarima qo‘llanadi.
Bundan tashqari, qonun bilan mahalla huquq-tartibot maskanlari hamda tayanch punktlari faoliyati, shuningdek profilaktika inspektorlarining vakolatlarini aniqlashtirishga qaratilgan o‘zgartirishlar ham kiritildi.
Mazkur qonun rasmiy e’lon qilingan kundan e’tiboran kuchga kirdi.
