Eron AQSh bilan muzokaralarning ikkinchi bosqichida ishtirok etadi — Islomobod
Tehron Hormuz bo‘g‘oziga qo‘yilgan blokada bekor qilingach muzokaralarni boshlashi mumkin.
Hormuz bo‘g‘ozidagi keskinlikka qaramay, Eron delegatsiyasi Islomobodda AQSh bilan muzokaralarning ikkinchi bosqichida qatnashadi. Bu haqda Anadolu axborot agentligi Pokiston rasmiylariga tayanib xabar bermoqda.
Pokiston rasmiylarining bildirishicha, Eron 21 aprel kuni Pokiston poytaxti Islomobodda o‘tkazilishi rejalashtirilgan muzokaralarda ishtirok etishni rejalashtirmoqda.
Manbaga ko‘ra, Eron delegatsiyasi parlament spikeri Muhammad Bag‘ir G‘olibaf hamda tashqi ishlar vaziri Abbos Aroqchi boshchiligida ertaga Islomobodga yetib keladi.
AQSh delegatsiyasiga esa mamlakat vitse-prezidenti Jey Di Vance rahbarlik qilishi kutilmoqda. Uning tarkibiga AQSh prezidenti Donald Trampning kuyovi Jared Kushner hamda Trampning Yaqin Sharq bo‘yicha maxsus vakili Stiv Uitkoff kirishi mumkin.
Avvalroq Pokiston tomoni AQShning “ilg‘or muzokara guruhi”ni olib kelgan ikkita samolyot Islomobodga qo‘nganini ma’lum qilgan edi. Vashington esa hozircha bu ma’lumotga izoh bermadi.
Eron prezidenti Mas’ud Pezeshkiyon urush hech bir tomon manfaatlariga mos kelmasligini ta’kidladi. U vaziyatni yumshatish uchun “barcha oqilona va diplomatik vositalar”dan foydalanishga chaqirdi.
Eron OAVlariga ko‘ra, Tehron delegatsiyasi AQSh harbiy-dengiz kuchlari tomonidan Hormuz bo‘g‘oziga qo‘yilgan blokada bekor qilinmaguncha muzokaralarni boshlamaslik niyatida.
