O‘zbekistonda qalbaki alkogol va tamaki mahsulotlari xavfi haqida ogohlantirish berildi
Hududlarda yaroqlilik muddati o‘tgan, qalbaki alkogol va tamaki mahsulotlarini noqonuniy muomalaga kiritish holatlari aniqlanmoqda.
Alkogol va tamaki bozorini tartibga solish inspeksiyasi aholi va tadbirkorlarni sifatsiz hamda salomatlik uchun xavfli mahsulotlardan ehtiyot bo‘lishga chaqirdi.
Ma’lum qilinishicha, ommaviy axborot vositalari va ijtimoiy tarmoqlarda bu borada bir necha bor ogohlantirishlar berilishiga qaramay, hududlarda yaroqlilik muddati o‘tgan, shuningdek, qalbaki alkogol va tamaki mahsulotlarini noqonuniy muomalaga kiritish holatlari hali ham uchrab turibdi.
Inspeksiya bunday mahsulotlarni aniqlashda qator muhim jihatlarga e’tibor qaratish zarurligini ta’kidlamoqda. Xususan, xarid vaqtida mahsulotda aksiz markasi mavjudligi, raqamli markirovka bor-yo‘qligi, yaroqlilik muddati hamda ishlab chiqarilgan sana (kun, oy, yil) ko‘rsatilganiga alohida ahamiyat berish lozim.
Shuningdek, mahsulotlarda 21 yoshga to‘lmagan shaxslarga iste’mol qilish taqiqlangani haqidagi yozuvlar va tibbiy ogohlantirish belgilari aniq hamda ravshan bo‘lishi shart.
Idora fuqarolardan shubhali holatlarga duch kelganda Inspeksiyaning ishonch raqami — 71 202 86 90 orqali murojaat qilishni so‘radi.
Ta’kidlanishicha, bunday holatlarga befarq bo‘lmaslik aholi salomatligini muhofaza qilish, shuningdek, noqonuniy ishlab chiqarish va yashirin iqtisodiyotga qarshi kurashishda muhim ahamiyat kasb etadi.
