Toshkentda haydovchi o‘quvchini urib, qochib ketdi
O‘quvchi boshidan jarohat olgani aytilmoqda.
Toshkentda Damas haydovchisi maktab o‘quvchisini urib yuborib, voqea joyidan qochib ketdi. Bu haqda Toshkent shahar IIBB YHXB axborot xizmati boshlig‘i Qahramon Xudoyberganov xabar berdi.
Ma’lum qilinishicha, YTH 20-aprel kuni Olmazor tumanidagi Keles yo‘li ko‘chasida sodir bo‘lgan. Tarqalgan videoda ikki nafar bola piyodalar o‘tish joyi yaqinidan yo‘lni kesib o‘tayotgani, shu paytda ulardan birini avtomobil urib ketgani va o‘quvchi yiqilgani aks etgan.
Toshkent shahar IIBB xodimlari haydovchining shaxsini aniqlab, u 19 yoshli yigit ekanini bildirdi. Haydovchining aytishicha, u bolalarni payqagach signal chalgan, ulardan biri to‘xtagan, biroq orqadagi bola chalg‘ib qolgan va yo‘lga yugurib chiqqan.
U bolani urib yubormaslikka harakat qilgani, biroq buni uddalay olmaganini aytgan. Haydovchiga ko‘ra, u bolani urib yuborgandan so‘ng u sarosimaga tushib, shok holatida harakatni davom ettirgan. Keyinroq to‘xtab o‘ziga kelgan va qaytishga qaror qilgan, biroq bu vaqtda jabrlanuvchini tez yordam mashinasi olib ketgan. Yo‘lda u tez yordam mashinasidan orta qolib ketgan.
Shundan so‘ng haydovchi Kelesdagi huquq-tartibot organlariga borib, voqea haqida xabar bergan.
Hozirda ushbu hodisa bo‘yicha Ma’muriy javobgarlik to‘g‘risidagi kodeksining 133-moddasi (transport vositalari haydovchilarining yo‘l harakati qoidalarini buzishi jabrlanuvchiga yengil tan jarohati yoki ancha miqdorda moddiy zarar yetkazilishiga olib kelishi) va 137-moddasi (yo‘l-transport hodisasi yuz bergan joydan ketib qolish) bo‘yicha bayonnomalar rasmiylashtirilgan.
Matbuot xizmatining ta’kidlashicha, agar piyodaning jarohatlari yengil bo‘lsa, ish ma’muriy tartibda ko‘rib chiqiladi. Agar jarohat jiddiy bo‘lsa, jinoiy ish qo‘zg‘atiladi.
Voqeaga guvoh bo‘lganlar, o‘quvchi boshidan jarohat olganini aytmoqda.
