60 ming dollar pora bilan ushlangan Namangan shahri sobiq hokimi ustidan sud boshlandi
Sobiq hokim ko‘p qavatli uy qurish huquqini olib berish va moliyalashtirish evaziga pora olayotganida ushlangandi.
Bugun jinoyat ishlari bo‘yicha O‘zbekiston tuman sudida 60 ming AQSH dollari miqdorida pora olishda gumonlangan Namangan shahrining sobiq hokimi Anvarjon Otaxo‘jayev va yana besh kishiga oid ishni ko‘rish boshlandi. Bu haqda Farg‘ona viloyati sudlari xabar berdi.
Ma’lum qilinishicha, jami 6 nafar sudlanuvchining barchasi erkak bo‘lib, 3 nafar sudlanuvchiga nisbatan “qamoqqa olish”, 3 nafariga esa “munosib xulq-atvorda bo‘lish” tarzidagi ehtiyot choralari qo‘llanilgan.
Dastlabki tergov organining ayblov xulosasiga ko‘ra sudlanuvchilar Jinoyat kodeksining 167, 168, 205, 206, 209, 28,209, 210, 28,211 va 212-moddalarida nazarda tutilgan jinoyatlarni sodir etganlikda ayblanmoqda.
- 167-modda: O‘zlashtirish yoki rastrata yo‘li bilan talon-toroj qilish;
- 168-modda: Firibgarlik;
- 205-modda: Hokimiyat yoki mansab vakolatini suiiste’mol qilish;
- 206-modda: Hokimiyat yoki mansab vakolati doirasidan chetga chiqish;
- 209-modda: Mansab soxtakorligi;
- 28−209-modda: Mansab soxtakorligida ishtirokchilik;
- 210-modda: Pora olish;
- 28−211-modda: Pora berishda ishtirokchilik;
- 212-modda: Pora olish-berishda vositachilik qilish.
Avval xabar berilganidek, Otaxo‘jayev va poyabzal ishlab chiqaruvchi MCHJ rahbari o‘zaro til biriktirib, qurilish sohasida tadbirkorlik faoliyati bilan shug‘ullanmoqchi bo‘lgan fuqarodan shahar hududidagi 35 sotix yer maydonida joylashgan, ma’nan eskirgan turarjoy binolari o‘rniga ko‘p qavatli uy barpo etish huquqini olib berish va moliyalashtirish evaziga 60 ming dollar talab qilgan.
