Bog'cha bolalari o‘rtasida “Tabiat bolalar nigohida” rasmlar tanlovining final bosqichi o‘tkazildi
G‘olib bo‘lgan ishtirokchilarning ishlari Samarqandda o‘tkaziladigan Global ekologik fondning VIII assambleyasi va “Eco Expo Central Asia 2026” xalqaro ko‘rgazmasida taqdim etiladi.
Ekologiya va iqlim o‘zgarishi milliy qo‘mitasi huzuridagi “Green University”da “Tabiat bolalar nigohida” respublika rasmlar tanlovining maktabgacha ta’lim tashkilotlari tarbiyalanuvchilari o‘rtasidagi Respublika bosqichi tashkil etildi.
Ma’lumot uchun, tanlov Ekologiya qo‘mitasi, Maktabgacha va maktab ta’limi vazirligi hamda Kasbiy ta’lim agentligi bilan hamkorlikda MTT tarbiyalanuvchilari, umumiy o‘rta ta’lim hamda rassomlik va dizaynga ixtisoslashtirilgan maktablarning 5-7, 8-10, 11-13 va 14-16 yoshdagi o‘quvchilari o‘rtasida o‘tkazilmoqda.
MTT tarbiyalanuvchilari o‘rtasidagi final bosqichida barcha hududlardagi bosqichlarda g‘olib bo‘lgan bolalar ishtirok etdi. Tanlov davomida ishtirokchilar tabiatning noyob manzaralarini o‘z nigohlari bilan tasvirlashdi va bir-biridan betakror suratlar chizishdi.
Yakunda o‘g‘il bolalar o‘rtasida Timur Alisherov 1-o‘rinni (Toshkent shahri), Salohiddin Shokirov 2-o‘rinni (Farg‘ona viloyati) va Usmonjon Ubaydullayev 3-o‘rinni (Samarqand viloyati) qo‘lga kiritdi. Qizlar o‘rtasida esa 1-o‘rin Kumushoy Tursunbekovaga (Xorazm viloyati), 2-o‘rin Fotima Murodqulovaga (Samarqand viloyati), 3-o‘rin esa Mubina Hasanovaga (Navoiy viloyati) nasib etdi. G‘oliblar munosib taqdirlandi.
Tanlovning rassomlik va dizaynga ixisoslashtirilgan maktablar o‘quvchilari o‘rtasida respublika bosqichi 7-may kuni, umumiy o‘rta ta’lim maktablar o‘quvchilari o‘rtasida hududiy bosqichlar esa 1-mayga qadar bo‘lib o‘tadi. G‘olib bo‘lgan ishtirokchilarning ishlari Samarqandda o‘tkaziladigan Global ekologik fondning VIII assambleyasi va “Eco Expo Central Asia 2026” xalqaro ko‘rgazmasida taqdim etiladi.
Mazkur tanlov bolalar va yoshlarning ijodiy qobiliyatlarini rivojlantirish, ularda badiiy estetik didni shakllantirish, tabiatga bo‘lgan mehr-muhabbatni oshirish va ekologik madaniyatni shakllantirish, bolalarni atrof-muhitni asrash, uni go‘zallik bilan idrok etish hamda tabiat bilan uyg‘un yashashga o‘rgatish, yosh rassomlarning iste’dodini kashf etish va ularni qo‘llab-quvvatlashga xizmat qilishi kutilmoqda.
