Surxondaryoda daryoga neftga o‘xshash suyuqlik oqishi holati Ekopolitsiya tomonidan o‘rganilmoqda
Boysun–Bandixon hududida kuzatilgan sel sabab daryoga neft aralash suyuqlik oqib chiqishi kuzatilgan.
Ijtimoiy tarmoqlarda Surxondaryo viloyatining Qumqo‘rg‘on tumanida joylashgan daryoga neftga o‘xshash suyuqlik oqib tushayotgani haqidagi xabarlar tarqalgan edi.
Mazkur holat Ekologiya va iqlim o‘zgarishi milliy qo‘mitasi Davlat ekologik nazorat inspeksiyasi (Ekopolitsiya) tomonidan voqea joyiga chiqqan holda o‘rganilmoqda.
Dastlabki o‘rganishlarga ko‘ra, 2026-yil yanvar oyida Boysun tumanidagi Xongaronsoy hududida tabiiy geologik jarayonlar natijasida yer ostidan neft aralash suyuqlik chiqishi kuzatilgan. Ushbu suyuqlikning soyga oqib ketmasligi uchun maxsus hovuz hosil qilingan.
Biroq Boysun tumanida kuzatilgan sel oqibatida mazkur himoya hovuzi buzilib, neft aralash suyuqlik Bandixon soyiga oqib ketgan. Keyinchalik ushbu oqim suv tizimi orqali Surxondaryo daryosiga yetib borgan.
Hozirda vaziyatni bartaraf etish bo‘yicha maxsus texnikalar jalb etilgan holda ishlar olib borilmoqda. Shu bilan birga, daryoga oqib tushgan suyuqlik hajmi va tarkibini aniqlash maqsadida ikki ishchi guruh tashkil etildi.
O‘rganish ishlari davom etmoqda va yakuniy natijalar yuzasidan qo‘shimcha rasmiy axborot taqdim etiladi.
Shuningdek, holat yuzasidan tegishli qonunchilik asosida aybdor shaxslarga nisbatan qonunchilikka muvofiq qat’iy javobgarlik choralari qo‘llaniladi.
Eslatib o‘tamiz, avvalroq ushbu holat “O‘zbekneftgaz” AJ faoliyatiga aloqador emasligi rasman bildirilgan edi.
