AQSH delegatsiyasi Eron bilan muzokara o‘tkazish uchun Islomobodga boradi

AQSH prezidenti Donald Tramp o‘z elchilari Stiv Uitkoff va Jared Kushnerni Islomobodda Eron tashqi ishlar vaziri Abbos Aroqchi bilan muzokaralar o‘tkazish uchun yubormoqda. Bu haqda Associated Press Oq uyga tayanib xabar berdi.

 

Oq uy matbuot kotibi Kerolayn Levittning Reuters agentligiga ma’lum qilishicha, ular 25-aprel kuni Pokistonga jo‘nab ketadi. Uning so‘zlariga ko‘ra, aprelda Eron bilan muzokaralarning birinchi bosqichini o‘tkazgan AQSH vitse-prezidenti Jey Di Vens ham, agar Vashington zarur deb hisoblasa, Islomobodga borishi mumkin.

 

Eron tashqi ishlar vaziri esa allaqachon Pokistonga yetib kelgan. Reuters manbalariga ko‘ra, Aroqchi AQSH muzokarachilari bilan uchrashishni rejalashtirmayapti, uning tashrifi qisqa bo‘ladi. U Pokistonga AQSHga yetkazilishi lozim bo‘lgan takliflarini taqdim etmoqchi. Shundan so‘ng Aroqchi Maskat (Oman) va Moskvaga yo‘l oladi.

 

Axios nashri jurnalisti Barak Ravidning manbalarga tayanib xabar berishicha, AQSH va Eron muzokarachilari avval Pokiston vositachilari bilan alohida-alohida uchrashganidan keyin o‘zaro uchrashuv o‘tkazishi mumkin. 

 

Axios manbalariga ko‘ra, AQSH, Eron va Pokiston ishtirokidagi uch tomonlama uchrashuv 27-aprel kuni bo‘lib o‘tishi kutilmoqda.

 

AQSH va Eron 7-aprel kuni 28-fevraldan beri davom etayotgan urushni yakunlash bo‘yicha kelishuvga erishish maqsadida vaqtinchalik sulh tuzgan edi. Tomonlar Islomobodda birinchi bosqich muzokaralarini o‘tkazgan, biroq hech qanday kelishuvga erisha olmagan. Keyinchalik yangi uchrashuv sanasi uzoq muhokama qilingan, biroq Tehron vakillari muzokara o‘tkazishni rad etib kelgan.