Biznes-ombudsman Toshkentning “Dizayn-kodi” qarorini qayta ko‘rib chiqishni talab qildi
Umumiy ovqatlanish sohasi tadbirkorlari yangi dizayn-kod “savodsizlarcha” qilinganini aytib, peshlavhalarni majburiy demontaj qilish chog‘ida elektr energiyasini o‘chirish bilan tahdid qilinayotganidan shikoyat qildi.
Biznes-ombudsman devoni tomonidan Xalq deputatlari Toshkent shahar Kengashining 2026-yil 17-fevraldagi “Dizayn-kodi”ga oid qarori tadbirkorlik faoliyatiga ta’siri nuqtayi nazaridan o‘rganildi.
Ma’lum qilinishicha, mazkur hujjatning ayrim bandlari amaldagi qonunchilik talablariga zid ekani aniqlangan. Xususan, Normativ-huquqiy hujjatlar to‘g‘risidagi Qonunga muvofiq, tadbirkorlik faoliyatiga ta’sir etuvchi hujjatlar loyihalari Biznes-ombudsman bilan majburiy tartibda kelishilishi lozim. Biroq ushbu qaror Vakil bilan kelishilmasdan qabul qilingani qayd etilgan.
Shuningdek, qarorda reklama vositalariga qo‘yilgan “past to‘yingan” yoki “neytral” rang kabi tushunchalarning aniq huquqiy mezonlari belgilanmagani ta’kidlangan. Bu esa, mutaxassislar fikricha, tadbirkorlarning intellektual mulk huquqlariga, xususan ro‘yxatdan o‘tgan brendlar manfaatlariga salbiy ta’sir ko‘rsatishi mumkin.
Bundan tashqari, yangi talablarga moslashish uchun belgilangan 3 oylik muddat yetarli emasligi, jarayonni bosqichma-bosqich joriy etish mexanizmlari nazarda tutilmagani ham qayd etilgan. Bir necha obyektlarga ega bo‘lgan tarmoq tashkil etgan brendlarning manfaatlari inobatga olinmagan.
Shu munosabat bilan Biznes-ombudsman tomonidan Toshkent shahar Kengashiga qarorning tadbirkorlik faoliyatiga daxldor qismlarini qayta ko‘rib chiqish, tegishli o‘zgartirishlar kiritish hamda kuchga kirish muddatini uzaytirish yuzasidan rasmiy xulosa kiritilgan.
Vakil devoni, shuningdek, mazkur hujjatni tadbirkorlar manfaatlarini inobatga olgan holda, o‘z xodimlari ishtirokida qayta ishlab chiqishni taklif etgan.
Shuningdek, Savdo-sanoat palatasi tomonidan o‘tkazilgan ochiq muloqotda, umumiy ovqatlanish sohasi tadbirkorlari Toshkentning yangi dizayn-kodi “savodsizlarcha” qilinganini aytib, peshlavhalarni majburiy demontaj qilish chog‘ida elektr energiyasini o‘chirish bilan tahdid qilinayotganidan shikoyat qildi.
Xususan Giotto tarmog‘i asoschisi Kemal Kaya dizayn kodini ishlab chiqqan kompaniyani keskin tanqid qilib, ularning ishini “savodsizlik” deb atadi. U bunga misol qilib prezident tashrifi arafasida “O‘zbekiston ovozi” ko‘chasidagi (S-1) filial bilan bog‘liq vaziyatni keltirdi.
Tadbirkor hokimlik talabi bilan restoran peshlavhasini bir necha bor o‘zgartirganini aytdi. Oqibatda oxirgi hokimlik xodimlarining o‘ziga ham yoqmagan.
Restorator hujjatda belgilangan peshlavhalar proporsiyalari (harflar 50 sm dan oshmasligi) noto‘g‘ri ekanini aytib, bu muassasalar, ayniqsa xalqaro brendlarga qiyinchilik tug‘dirayotganini bildirdi.
“Siz mamlakatni butun Yevropa oldida sharmanda qilyapsiz Bunday loyihani normal mamlakatda qila olmaysiz, uzr. Bu usul o‘tmaydi Italyanlar kulyapti. Papa Johns’da ham xuddi shu muammo. Hammada muammo bor. Nega bu yerda muammo bo‘lishi kerak? Bunga hokimiyat emas, loyihani ishlab chiqqan odamlar aybdor. Ularning aybi tufayli hokimiyatga ham, sizga ham, odamlarga ham — hammaga qiyin bo‘lyapti. O‘zbekistonni Shimoliy Koreyaga aylantirmoqchisiz”, — deya qayd etdi u.
Dizayn kodni ishlab chiqishga rahbarlik qilgan “Toshkent Invest” kompaniyasining developerlik loyihalarini shakllantirish va qo‘llab-quvvatlash bo‘limi boshlig‘i Rushana Hasanova rasmiylar hujjatni muhokama qilishga ochiq ekanini ma’lum qildi.
Ma’lumotlarga ko‘ra, loyiha ishlab chiquvchisi Rossiyaning CM International kompaniyasi hisoblanadi. U 2024-yildan buyon hokimlik huzuridagi “Toshkent Invest” kompaniyasi buyurtmasi asosida loyiha bilan shug‘ullanib kelgan.
Eslatib o‘tamiz, Toshkent shahar hokimligining “peshlavhalarni birxillashtirish” haqidagi qaroridan keyin Toshkent shahrining bir qator markazlaridagi tadbirkorlik subyektlariga bir necha bor o‘zgartirish kiritilganidan tadbirkorlar norozi bo‘lib kelayotgan edi.
