Namanganda Lacetti soyga tushib ketdi
Hodisa joyida qutqaruvchilar va ko‘ngillilar ikki nafar fuqaroni mashinadan olib chiqqan.
Bugun, 25-aprel kuni Namangan viloyati To‘raqo‘rg‘on tumanida yo‘l-transport hodisasi sodir bo‘ldi. Bu haqda Favqulodda vaziyatlar vazirligi ma’lum qildi.
Qayd etilishicha, tumanning “Oqtosh” mahallasida harakatlanayotgan Lacetti rusumli avtomobil haydovchisi boshqaruvni yo‘qotishi oqibatida transport vositasi soyga tushib ketgan.
Hodisa yuzasidan “112” yagona dispetcherlik tizimi orqali Namangan viloyati Favqulodda vaziyatlar boshqarmasiga xabar kelib tushgan. Shundan so‘ng qutqaruvchilar zudlik bilan voqea joyiga yetib borgan.
Qutqaruvchilar atrofdagi ko‘ngilli fuqarolar bilan birgalikda avtomobil ichida bo‘lgan ikki nafar fuqaroni qutqarib, xavfsiz hududga olib chiqqan. Shundan so‘ng jabrlanganlar tez tibbiy yordam xodimlariga topshirilgan.
