Toshkent viloyatida tadbirkordan 63 ming dollar talab qilgan FVV xodimi qamoqqa olindi
U 5,04 milliard so‘mlik shartnomalarni vazirlikdagi aloqalari orqali mahalliy korxonaga olib berganini da’vo qilgan.
Toshkent viloyatida tadbirkordan 63 ming AQSh dollari talab qilgan mansabdor shaxsga nisbatan jinoyat ishi qo‘zg‘atildi. Bu haqda DXX Zamon.uzga xabar berdi.
Ma’lum qilinishicha, Favqulodda vaziyatlar vazirligining Toshkent viloyatidagi tumanlardan birida faoliyat yuritgan rahbar mansab vakolatidan foydalanib, hududdan oqib o‘tuvchi uchta soy qirg‘og‘ini mustahkamlash hamda beton plitali yo‘l o‘tkazgichlar qurilishi bo‘yicha umumiy qiymati 5,04 milliard so‘mlik shartnomalarni go‘yoki vazirlikdagi aloqalari orqali mahalliy korxonaga olib berganini vaj qilib ko‘rsatgan.
U mazkur korxona rahbaridan buning evaziga 63 ming AQSh dollari miqdorida ulush talab qilgan. Dastlabki ma’lumotlarga ko‘ra, joriy yilning mart-aprel oylarida ushbu mablag‘ning 24 ming dollari olingan.
Shundan so‘ng mansabdor qolgan 39 ming dollarni ham berishni talab qilib kelgan.
Davlat xavfsizlik xizmati xodimlari tomonidan Bosh prokuratura huzuridagi Departamentning Toshkent viloyati boshqarmasi hamda Favqulodda vaziyatlar vazirligining Shaxsiy xavfsizlik boshqarmasi bilan hamkorlikda o‘tkazilgan tezkor tadbirda u talab qilingan pulning 25 ming dollarini o‘zining “Tracker” rusumli xizmat mashinasida olayotgan vaqtida ashyoviy dalillar bilan ushlandi.
Hozirda mazkur shaxsga nisbatan jinoyat ishi qo‘zg‘atilib, qamoq ehtiyot chorasi qo‘llangan.
