Bangladeshda chaqmoq urishi oqibatida so'ngi 24 soatda 14 kishi halok bo‘ldi
Chaqmoq urishlari mamlakatning kamida yetti tumanida qayd etilgan.
Bangladeshda so‘nggi 24 soat ichida yuz bergan mavsumiy chaqmoq urishlari oqibatida kamida 14 kishi halok bo‘ldi. Reuters xabarlariga ko‘ra, qurbonlarning aksariyati ochiq dalalarda qishloq xo‘jaligi ishlari bilan band bo‘lgan fermerlar bo‘lib, to‘satdan boshlangan momaqaldiroq vaqtida daraxtlar ostida boshpana topishga uringan.
Chaqmoq urishlari mamlakatning kamida yetti tumanida qayd etilgan. Favqulodda vaziyatlar xizmatlari bir qator hududlarda qidiruv-qutqaruv va tibbiy yordam ishlarini olib bormoqda. Jarohat olgan bir nechta fuqarolar yaqin atrofdagi shifoxonalarga yetkazilgan, ayrimlarining ahvoli og‘ir ekani bildirilmoqda.
Bangladeshda har yili chaqmoq urishi natijasida yuzlab insonlar hayotdan ko‘z yumadi. Mutaxassislar ushbu holatlarni asosan musson mavsumidan oldingi aprel–iyun oylarida kuzatiladigan kuchli issiqlik, namlik va beqaror ob-havo sharoitlari bilan bog‘lamoqda. 2016-yilda mamlakat hukumati chaqmoq urishini rasmiy ravishda tabiiy ofat sifatida tan olgan.
Ekspertlar fikricha, o‘rmonlarning qisqarishi va baland daraxtlar sonining kamayishi chaqmoqdan tabiiy himoya darajasini pasaytirib, insonlar uchun xavfni oshirmoqda.
