Eron AQShga urushni tugatish bo‘yicha taklif yubordi — Axios
Oq uy mazkur taklifni olgan, biroq Vashington uni qachon ko‘rib chiqishi ma’lum emas.
Eron AQShga Hormuz bo‘g‘ozini ochish va urushni to‘xtatishni nazarda tutuvchi taklif yubordi. Bu haqda Axios nashri manbalarga tayanib xabar berdi.
Ma’lum qilinishicha, yangi taklif Eron tashqi ishlar vaziri Abbos Aroqchi tomonidan o‘tgan dam olish kunlari (25–26 aprel) Islomobodda o‘tkazilgan muzokaralar chog‘ida Pokiston vositachilari orqali AQShga yetkazilgan. Unga ko‘ra, o‘t ochishni to‘xtatish uzoq muddatga uzaytirilishi yoki tomonlar urushni butunlay yakunlash bo‘yicha kelishuvga erishishi mumkin.
Taklifga muvofiq, Eron yadro dasturi bo‘yicha muzokaralar Hormuz bo‘g‘ozi ochilib, Eron portlariga qo‘yilgan blokada bekor qilingandan keyin boshlanishi mumkin.
Oq uy mazkur taklifni olgani aytilmoqda, biroq Vashington uni ko‘rib chiqishga tayyormi yoki yo‘qmi — hozircha noma’lum.
Axios qayd etishicha, blokadaning bekor qilinishi va urushning tugatilishi AQShning Eron yadro dasturiga ta’sir o‘tkazish imkoniyatlarini cheklashi mumkin.
27 aprel kuni AQSh prezidenti Donald Tramp muzokaralardagi vaziyat va keyingi ehtimoliy qadamlarni o‘z jamoasi bilan muhokama qilishi kutilmoqda.
Avvalroq, 24 aprel kuni Tramp o‘z vakillari — Stiv Uitkoff va Jared Kushnerni Islomobodga muzokaralar uchun yubormoqchi bo‘lganini, biroq keyinchalik ularning safarini bekor qilganini ma’lum qilgan. Tramp Axios nashriga Eronning pozitsiyasi uni ushbu safarni bekor qilishga undaganini aytdi.
Eslatib o‘tamiz, Yaqin Sharqdagi mojaro boshlanganidan buyon Hormuz bo‘g‘ozi yopilgan, AQSh esa Eron portlariga nisbatan dengiz blokadasini joriy etgan.
