Namanganda kanalda oqib ketayotgan 3 yoshli bola qutqarildi
FVB xodimi bolaning oqib ketayotganini payqagach, suvga sakrab uni olib chiqqan. Bolaga o‘z vaqtida yordam ko‘rsatilgan va uning ahvoli yaxshi.
Namangan viloyati Yangi Namangan tumanida 26-aprel kuni FVV xodimi kanalda oqib ketayotgan 3 yoshli bolani qutqarib qoldi. Bu haqda viloyat FVB xabar berdi.
Ma’lum qilinishicha, hodisa tumandagi “Mingterak” mahalla fuqarolar yig‘ini hududidan oqib o‘tuvchi Katta Namangan kanalida sodir bo‘lgan.
Davlatobod tumani favqulodda vaziyatlar bo‘limi xodimi Ulug‘bek Asqarov xizmatdan uyga qaytayotgan vaqtda kanalda 3 yoshli bolaning oqib ketayotganini payqab qolgan.
Shundan so‘ng qutqaruvchi zudlik bilan suvga sakrab, cho‘kayotgan bolani olib chiqqan va uning hayotini saqlab qolgan. Ma’lum qilinishicha, bolaga o‘z vaqtida yordam ko‘rsatilgan va hozirda uning ahvoli yaxshi.
Qutqaruv jarayoni mahalliy aholi xonadonlaridan biriga o‘rnatilgan kuzatuv kamerasiga ham tushib qolgan.
