O‘zbekistonda ish joyidagi baxtsiz hodisalarda 62 kishi halok bo‘ldi
Eng ko‘p baxtsiz hodisalar sanoat va qurilish sohalarida kuzatilgan.
2026-yilning birinchi choragida O‘zbekistonda ishlab chiqarish bilan bog‘liq 198 ta baxtsiz hodisa qayd etildi. Bu haqda Kambag‘allikni qisqartirish va bandlik vazirligi ma’lum qildi.
Ma'lum qilinishicha, qayd etilgan hodisalarning 9 tasi guruhli, 139 tasi og‘ir oqibatli bo‘lgan. 49 ta holat esa o‘lim bilan yakunlangan.
Mazkur baxtsiz hodisalar oqibatida jami 223 kishi jabrlangan. Shundan 146 nafari og‘ir, 15 nafari yengil tan jarohati olgan, 62 nafari esa vafot etgan.
Tahlillarga ko‘ra, eng ko‘p baxtsiz hodisalar sanoat hamda qurilish sohalarida sodir bo‘lgan. Xususan, sanoatda 71 ta, qurilish tarmog‘ida esa 54 ta holat qayd etilgan.
Hududlar kesimida eng ko‘p hodisalar Toshkent shahrida 44 ta, Surxondaryo viloyatida 36 ta hamda Toshkent viloyatida 29 ta qayd etilgan.
