Xorazmda yuzdan ortiq muammoli masala hal etildi — Saida Mirziyoyeva
Saida Mirziyoyeva Prezidentning viloyatni ijtimoiy rivojlantirishga qaratilgan qarorlari ijrosini o‘rganmoqda.
Saida Mirziyoyeva Xorazm viloyatiga tashrif buyurib, Prezident tomonidan hududni ijtimoiy rivojlantirishga qaratilgan qarorlar ijrosi bilan tanishilayotganini ma’lum qildi.
Qayd etilishicha, o‘rganishlar davomida yuzdan ortiq muammoli masala qisqa muddatda hal etilgan. Shu bilan birga, obyektlarning soni va ko‘lamidan qat’i nazar, ularning har biri alohida, sinchkovlik bilan va yakuniga qadar nazorat qilinishi ta’kidlandi.
Tashrif doirasida Xonqa tumanidagi mukammal ta’mirtalab 2-sonli maktab hamda qarovsiz qolib, avariya holatiga kelgan 49-sonli maktabgacha ta’lim muassasasi ko‘zdan kechirildi.
Shuningdek, Davlat xoreografiya akademiyasining Urganch filialidagi sharoitlar ham o‘rganildi. Hozirda o‘quv auditoriyalari va bo‘lajak tarbiyalanuvchilar uchun mo‘ljallangan maktab-internat bir binoda faoliyat yuritayotgani qayd etildi.
Kelgusida qo‘shimcha bino qurilib, har bir muassasa uchun alohida va zamonaviy sharoitlar yaratilishi rejalashtirilgan.
