AQSH harbiysi o‘ta maxfiy sirlarni oshkor qildi
U Ukrainaga ajratilgan pullarning o‘marilishini, AQShda hamon zarin gazi borligini va Eronning yangi oliy rahbarini yo‘q qilish ko‘rib chiqilayotganini aytdi.
Pentagonning kimyoviy himoya bo‘yicha yuqori lavozimli mulozimi Endryu Hagg maxfiy ma’lumotlarni oshkor qilganlikda gumonlanib vaqtincha xizmatdan chetlatildi. Bu haqda yashirin tarzda suratga olingan video e’lon qilingach ma’lum bo‘ldi.
Ma’lumotlarga ko‘ra, yashirin videolavhada Endryu Hagg tanishuv sayti orqali uchrashgan “qiz”ga (jurnalistga) o‘ta maxfiy ma’lumotlarni ochiqlagani aks etgan.
Hagg suhbat davomida Ukrainaga ajratilgan mablag‘larning o‘marilishi, AQSHda hamon taqiqlangan zarin gazi zaxiralari mavjudligi va Merilenddagi laboratoriyada xavfsizlik qoidalari buzilgani haqida so‘zlab bergan. Mulozim ushbu gazdan yaqinda bir kimyogarning halok bo‘lganini ham qo‘shimcha qilgan.
Shuningdek, u AQSH yadro arsenalining joylashuvi va Vashingtonning Eronga nisbatan yadroviy strategiyasiga oid sirlarni ham oshkor qilgan.
Hagg Vashington Eron Oliy rahbari Mujtabo Xomanaiyni jismonan yo‘q qilish imkoniyatlarini ko‘rib chiqayotganini inkor etmagan. U agar Xomanaiy noo‘rin harakatlar qilsa nishonga olinishini bildrigan.
Bundan tashqari, u Eronning Minob shahridagi maktabga qilingan hujumda AQSHning bevosita ishtiroki borligini tasdiqlagan.
“Urushda bolalar doim o‘ladi” — degan Hagg.
Video e’lon qilinganidan so‘ng Urush vaziri Pit Hegset Endryu Haggning tizimdan chetlatilganini ma’lum qildi. Endryuga nisbatan davlat sirlarini oshkor qilish moddasi bo‘yicha jinoiy ish ochilishi mumkin.
