Janubiy Koreya sobiq birinchi xonimi Kim Gon Xi to‘rt yilga qamaldi
Avvalroq sud tomonidan Kim Gon Xi 20 oylik qamoq jazosiga hukm qilingan edi.
Janubiy Koreya apellyatsiya sudi sobiq birinchi xonim Kim Gon Xi ishi yuzasidan avval chiqarilgan hukmni qayta ko‘rib chiqib, unga nisbatan tayinlangan jazoni kuchaytirdi. Endilikda u to‘rt yil muddatga ozodlikdan mahrum etildi.
Avvalroq sud tomonidan Kim Gon Xi 20 oylik qamoq jazosiga hukm qilingan edi. Yangi qarorga muvofiq, jazo muddati sezilarli darajada oshirilgan. Shuningdek, sud tomonidan unga 50 million von miqdorida jarima ham belgilangan.
Tergov materiallariga ko‘ra, sobiq birinchi xonim avtomobil savdosi bilan shug‘ullanuvchi kompaniya aksiyalari narxlarini manipulyatsiya qilish orqali noqonuniy daromad olganlikda ayblangan. Ma’lumotlarda ushbu yo‘l bilan 810 million von miqdorida foyda ko‘rilgani qayd etilgan.
Bundan tashqari, u siyosiy kampaniyalarni moliyalashtirish qoidalarini buzish bilan bog‘liq ayblovlar bo‘yicha ham javobgarlikka tortilgan.
Ma’lumot uchun, uning turmush o‘rtog‘i, Janubiy Koreyaning sobiq prezidenti Yun Sok Yol ham avvalroq besh yil muddatga ozodlikdan mahrum etilgan edi. Hozirda unga nisbatan yana bir necha sud jarayonlari davom etmoqda.
