“Navoiy” chegara bojxona postida zo‘ravonlik qilgan shaxs 10 sutkaga qamaldi
U tashmachilik bilan shug‘ullanib, fuqarolardan pul undirgan.
Ijtimoiy tarmoqlarda keng tarqalgan va jamoatchilikda bojxona postida ko‘cha mafiyasi yuzaga kelganiga doir shubhalarga sabab bo‘lgan videodagi shaxs qamaldi, deya xabar bermoqda Bojxona qo‘mitasi matbuot xizmati.
Ma’lum qilinishicha, ushbu shaxs boshqa bir fuqaroning yukini go‘yoki shaxsiy ehtiyoj niqobi ostida olib o‘tib berish, ya’ni tashmachilik qilish evaziga dastlab 500 ming so‘m, so‘ngra yana 100 ming so‘m talab qilgan. Natijada o‘zaro kelishmovchilik yuzaga kelib, vaziyat janjal va haqorat qilishgacha borgan.
Holat yuzasidan Toshkent tumani Ichki ishlar bo‘limi tomonidan Ma’muriy javobgarlik to‘g‘risidagi kodeksning 183-moddasi bilan hujjatlar rasmiylashtirilib, sud qaroriga binoan 10 sutka ma’muriy qamoq jazosi tayinlandi.
Shuningdek, matbuot xizmati chegara bojxona postlarida xizmat faoliyati amaldagi qonunchilik talablari asosida yo‘lga qo‘yilganini ta’kidlab, fuqarolarni firibgarlarga ishonmaslikka chaqirdi.
