Qirol Charlz III AQShga davlat tashrifi bilan keldi

Buyuk Britaniya qiroli Charlz III va qirolicha Kamila AQShga to‘rt kunlik davlat tashrifi bilan yetib keldi. 

 

Ma'lum qilinishicha, mazkur davlat tashrifi Charlz III hukmronligi davridagi eng yirik va muhim tashriflardan biri bo‘lib, AQShning Britaniya hukmronligidan mustaqillik e’lon qilganining 250 yilligiga to‘g‘ri keladi. Shuningdek, bu so‘nggi 20 yil ichida britan monarxining AQShga ilk tashrifidir.

 

Tashrif AQSh va Britaniya hukumatlari o‘rtasida Eron bo‘yicha qarashlar turlicha bo‘lib turgan paytga to‘g‘ri keldi.

 

Buyuk Britaniya Qirol va Qirolichasini Oq uyda AQSh Prezidenti va birinchi xonim Melaniya Tramp kutib oldi. Tomonlar qisqa rasmiy qismdan so‘ng yopiq choy suhbatini o‘tkazdi.

 

Keyinroq Britaniya elchisining qarorgohida bog‘ ziyofati tashkil etildi. Unda siyosatchilar, diplomatlar va jamoatchilik vakillari, jumladan senator Ted Kruz hamda moliya vaziri Skott Bessent ishtirok etdi.

 

Tashrif dasturidan Kongressda nutq so‘zlash, Oq uyda davlat ziyofati va Nyu-York shahrigaa safar o‘rin olgan. Qirol nutqida ikki davlat o‘rtasidagi tarixiy hamkorlik va umumiy demokratik qadriyatlar alohida ta’kidlanishi kutilmoqda.

 

Kuzatuvchilarga ko‘ra, tashrif Buyuk Britaniya bosh vaziri Kir Starmer hukumati uchun ham muhim diplomatik sinov bo‘lib, “maxsus munosabatlar”ni tiklashga xizmat qilishi mumkin. Mazkur aloqalar Suvaysh krizisidan beri eng past darajaga tushgani aytilmoqda.

 

Shu bilan birga, AQSh va Isroilning Eronga qarshi harbiy harakatlari yuzasidan kelishmovchiliklar saqlanib qolmoqda. Vashington Britaniyaning bu boradagi pozitsiyasidan norozi ekanini bildirgan.

 

Safar yakunida qirollik juftligi Nyu-Yorkda 11-sentabr voqealari qurbonlarini yod etadi hamda Virjiniyada ekologiya yo‘nalishidagi loyihalar bilan tanishadi.

 

“So‘nggi kunlarda Tramp Britaniyaga nisbatan tanqidlarini biroz yumshatgan bo‘lsa-da, Pentagon ichki xatida AQSh Britaniyaning Folklend oroliga da’vosini qayta ko‘rib chiqishi mumkinligi qayd etilgan. Bu esa ikki tomonlama aloqalarni yanada taranglashtirishi mumkin”, deya yozmoqda Reuters.

 

Xabarga ko‘ra, tashrif davomida Charlz III chetlab o‘tishga harakat qiladigan masalalardan biri — Jeffri Epshteyn mojarosi. Qirolning ukasi sobiq shahzoda Endryu Epshteyn bilan aloqalari sabab obro‘sidan ayrilgan va tergovga tortilgan. Sobiq shahzoda  barcha ayblovlarni rad etgan.