Rossiyadan ota-ona qaramog‘isiz qolgan uch bola O‘zbekistonga qaytarildi
Joriy yilda Rossiyadan qaytarilgan bolalar soni 43 nafarga yetdi.
Joriy yilning 28-aprel kuni ota-onalari Rossiyadan deportatsiya qilingani sababli qarovsiz qolgan uch nafar voyaga yetmagan bola O‘zbekistonga qaytarildi. Bu haqda Ijtimoiy himoya milliy agentligi matbuot xizmati ma’lum qildi.
Bolalar Toshkent shahridagi Islom Karimov nomidagi xalqaro aeroportga olib kelingan. U yerda ularga dastlabki tibbiy va ijtimoiy yordam ko‘rsatilib, holati baholandi hamda tegishli hujjat va tartib-taomillar amalga oshirilgan.
Shu kunning o'zida bolalar o‘z ota-onalariga topshirilgan. Hozirda ularning yashash hududida “Inson” ijtimoiy xizmatlar markazlari tomonidan keyingi ijtimoiy qo‘llab-quvvatlash ishlari olib borilmoqda.
Ta’kidlanishicha, joriy yil boshidan buyon Rossiya Federatsiyasi hududidan O‘zbekistonga qaytarilib, oilalari bilan birlashtirilgan voyaga yetmaganlar soni 43 nafarga yetdi.
