AQSHda Tramp surati tushirilgan pasportlar chiqariladi

AQSHda Donald Tramp tasviri tushirilgan cheklangan miqdordagi yubiley pasportlar chiqariladi. Bu haqda Oq uyga tayanib, BBC xabar berdi.

 

Ma’lum qilinishicha, yangi dizayndagi pasportlar Qo‘shma Shtatlar mustaqilligining 250-yilligi munosabati bilan iyul oyida taqdim etiladi.

 

Rasmiylarga ko‘ra, mazkur pasportlar taqdimoti boshlangach, pasport olish uchun murojaat qilgan barcha AQSH fuqarolari uchun mavjud bo‘ladi va zaxira tugagunga qadar tarqatiladi. Ular faqat Vashingtondagi maxsus pasport agentligi orqali berilishi belgilangan.

 

AQSH Davlat departamenti taqdim etgan namunada prezident surati Mustaqillik deklaratsiyasi matni va Amerika bayrog‘i fonida aks etgan, shuningdek, unga oltin rangdagi imzo qo‘shilgan.

 

Hozirgi kunda AQSH pasportlarida mamlakat tarixiga oid lavhalar, jumladan oyga qo‘nish manzarasi hamda Ozodlik haykali kabi milliy ramzlar tasvirlangan.

 

Shu bilan birga, fuqarolar ushbu maxsus dizayndan voz kechish imkoniga ega bo‘ladimi-yo‘qmi — hozircha ma’lum emas.

 

Bu tashabbus Tramp ma’muriyati tomonidan prezident nomi va qiyofasini davlat dasturlari hamda jamoat obyektlari bilan bog‘lashga qaratilgan siyosatning davomi sifatida baholanmoqda.

 

Avvalroq 2026-yil iyundan boshlab AQSH qog‘oz pullarida prezident Donald Trampning imzosi aks etishi haqida xabar berilgandi.

 

Bundan tashqari, AQSh Mustaqillik bayrami munosabati bilan Trampning stol atrofida mushtini tugib turgan tasviri va “Ozodlik” yozuvi tushirilgan 24 karatli oltin tanga chiqarilishi ham ma’lum qilingandi.