Denovda 4 zo‘ravon bir erkakni urib o‘ldirdi
Janjal pul oldi-berdi masalasidagi ziddiyat tufayli yuz bergan.
Ijtimoiy tarmoqlarda Surxondaryo viloyatining Denov shahrida fuqaro urib o‘ldirilgani haqida tarqalgan xabarlar yuzasidan viloyat IIB rasmiy axborot berdi.
Ma’lum qilinishicha, 27-aprel kuni soat 17:50 atrofida “Bog‘ishamol” mahallasi hududida joylashgan avtotransport yuvish shoxobchasi oldida 1970-yilda tug‘ilgan A.U. va uning o‘g‘li, 1994-yilda tug‘ilgan A.A.ga bir guruh shaxslar hujum qilgan.
Dastlabki ma’lumotlarga ko‘ra, voqea pul oldi-berdi masalasida avvaldan mavjud bo‘lgan ziddiyat ortidan kelib chiqqan. Jabrlanuvchilarni ularning jiyani — 1989-yilda tug‘ilgan Q.Sh. hamda uning 3 nafar sherigi urgan va tan jarohati yetkazgan. Shundan so‘ng ular jabrlanuvchilardan birini "Gentra" avtomashinasiga o‘tqazib, voqea joyidan olib ketishgan.
Jabrlanuvchi A.A. shu kuni tuman tibbiyot muassasasiga yotqizilgan. U og‘ir, hayot uchun xavfli tan jarohatlari olgan bo‘lib, shifokorlar ko‘rsatgan muolajalarga qaramasdan 28-aprel kuni vafot etgan.
Holat yuzasidan Denov tumani IIB tomonidan O‘zbekiston Respublikasi Jinoyat kodeksining 104-moddasi 2-qismi “k, ye” bandlari bilan jinoyat ishi qo‘zg‘atilib, to‘rt nafar gumonlanuvchi protsessual tartibda qamoqqa olingan.
Keyinroq jinoyat ishi mazkur kodeksning 104-moddasi 3-qismi “d” bandiga qayta malakalangan.
Tergov harakatlari davom etmoqda.
