Endi jarima maydonchasidagi mashinani onlayn chiqarish mumkin
Yangi tartibga ko‘ra, murojaatlar avtomatlashtirilgan tizimda tekshirilib, 1 ish kunida javob beriladi.
Vazirlar Mahkamasining 2026-yil 28-apreldagi 208-sonli qaroriga muvofiq, avtomototransport vositalarini jarima maydonchasidan olib chiqish bo‘yicha Davlat yo‘l harakati xavfsizligi xizmatiga elektron tarzda murojaat qilishning ma’muriy reglamenti tasdiqlandi. Bu haqda Adliya vazirligi xabar berdi.
Ushbu tartibga ko‘ra, avtomototransport vositalarini jarima maydonchasidan chiqarish bo‘yicha davlat xizmati bir nechta qulay kanallar orqali amalga oshiriladi. Xususan, fuqarolar Yagona interaktiv davlat xizmatlari portali (my.gov.uz), Davlat yo‘l harakati xavfsizligi xizmatining mobil ilovasi hamda Davlat xizmatlari markazlari orqali murojaat qilish imkoniyatiga ega bo‘ladilar.
Murojaat qiluvchi YAIDXP yoki mobil ilova orqali ariza yuborganida, elektron shaklda so‘rovnoma to‘ldiriladi va undagi ma’lumotlarning to‘g‘riligi avtomatlashtirilgan tizim orqali tekshiriladi.
Vakolatli organ tomonidan murojaat ko‘rib chiqish jarayonida transport vositasining jarima maydonchasiga joylashtirilish asoslari, shuningdek, ushbu asoslarning bartaraf etilgani yoki ma’muriy ish yuzasidan qonuniy qaror qabul qilinganligi o‘rganiladi.
Agar barcha talablar bajarilganligi tasdiqlansa, murojaat qiluvchiga bir ish kuni ichida transport vositasini jarima maydonchasidan olib chiqishga ruxsat beruvchi elektron xabarnoma yuboriladi.
