Men uchun do‘st yoki qarindosh degan tushuncha yo‘q — Sadir Japarov

 

Qirg‘iziston Prezidenti Sadir Japarov Kaktus.media nashriga bergan intervyusida mamlakatdagi siyosiy jarayonlar, fevral oyidagi voqealar, davlat to‘ntarishiga urinish haqidagi iddaolar, xavfsizlik idoralari faoliyati, shuningdek sobiq Milliy xavfsizlik davlat qo‘mitasi (GKNB) rahbari Qamchibek Tashiyev va uning oilasi bilan bog‘liq masalalarga izoh berdi.

 

               

 

Prezident intervyu davomida bir qator savollarga javob berib, davlat siyosati, korrupsiyaga qarshi kurash va shaxsiy munosabatlarning davlat boshqaruvidagi o‘rni haqida o‘z pozitsiyasini bildirgan.

 

Fevral oyidagi siyosiy jarayonlar va “davlat to‘ntarishiga urinish” haqidagi savolga javob berar ekan, Sadir Japarov vaziyat boshidan nazorat ostida bo‘lganini ta’kidlagan:

“Men turli manbalardan ma’lumot olaman. ‘75 kishilik xat’ bilan bog‘liq jarayon boshlangan paytda ham menda yetarli axborot bor edi. Hujjatning parlamentga kirib kelishidan boshlab harakatlarni kuzatdim. Masala yalpi majlisga chiqishidan oldin zarur choralarni ko‘rdik. Vaziyat boshidan nazoratda edi”, — dedi Japarov.

 

               

 

Uning so‘zlariga ko‘ra, xavfsizlik xizmatlari jarayonlarga jalb qilingan bo‘lsa-da, barcha harakatlar to‘liq nazorat ostida bo‘lmagan holatlar ham bo‘lishi mumkin.

 

Prezident davlat rahbari sifatida xavfsizlik idoralari faoliyatidan xabardor ekanini bildirib, “Men prezident va bosh qo‘mondon sifatida asosiy jarayonlardan xabardorman. Kim nima qilayotganini bilaman. Lekin hamma narsa to‘liq mening nazoratimda deb ayta olmayman”, — deya ta'kidlagan.

 

Shuningdek, iste’foga chiqqan deputatlar masalasiga to‘xtalib: “Ayrim siyosiy guruhlar parlamentda muayyan jarayonlarni amalga oshirmoqchi bo‘lgan. Ular muvaffaqiyatsizlikka uchragach, ayrimlar o‘z mandatlarini topshirgan bo‘lishi mumkin. Yakuniy xulosani tergov beradi”, — dedi Japarov.

 

                   

 

Tashiyevga oid savolga javob berar ekan, prezident shaxsiy munosabatlar davlat siyosatiga ta’sir qilmasligini alohida ta’kidlagan.

 

“Men uchun ‘do‘st’, ‘qarindosh’ yoki ‘yaqin inson’ degan tushunchalar davlat ishida yo‘q. Davlat va xalq manfaatlari birinchi o‘rinda”, — dedi Japarov.

 

Uning so‘zlariga ko‘ra, har qanday ish bo‘yicha yakuniy qarorni sud chiqaradi: “Tergov bor, ish sudga oshiriladi. Kim aybdor, kim aybsiz — buni faqat sud belgilaydi.”

 

Shuningdek, Shairbek Tashiyev ishi bo‘yicha davlatga katta miqdorda zarar yetkazilgani aniqlangani va zarar qoplangandan keyingina ozodlik masalasi ko‘rib chiqilishi mumkinligi qayd etilgan.

 

Prezident oila a’zolarining davlat ishlariga aralashmasligini aytib o‘tgan.

 

“Mening oilam va qarindoshlarim davlat boshqaruviga aralashmaydi. Biz avvalgi xatolarni takrorlamaslikka qaror qilganmiz”, — deya ta'kidlagan u.

 

               

 

O‘g‘li va qarindoshlari investorlar bilan muloqotda bo‘lishi mumkinligini, ammo davlat tuzilmalariga aloqador emasligini bildirgan.

 

Shuningdek, oltin bilan bog‘liq ayblovlarni rad etib, “Bu 1000 foiz yolg‘on. Suratga tushish holati noto‘g‘ri talqin qilingan”, — degan Japarov.

 

Kazino qonuni bo‘yicha tanqidlarga javoban prezident bu qaror iqtisodiy maqsadlarda qabul qilinganini aytgan. “Bu qaror davlat manfaatidan kelib chiqib qabul qilingan. Natijada byudjetga daromad tushmoqda, ish o‘rinlari yaratildi”.

 

Shuningdek, Qirg‘iziston Prezidenti Rossiyaga tashrif siyosiy bosim bilan bog‘lanmaganini bildirib, “Men tashabbus bilan Moskvaga bordim. Muzokaralarda strategik hamkorlik masalalari muhokama qilindi”, — deya ta'kidlagan Japarov.