O‘zbekiston Kiberxavfsizlik markazi xodimlarining shaxsiy ma’lumotlari o‘g‘irlandimi?
Xaker yana boshqa ma'lumotlarni e'lon qilmaslik uchun 200 ming dollar so'ragan. Holat yuzasidan Kiberxavfsizlik markazi rasmiy munosabat bildirdi.
Kiberjinoyatchilar va xakerlar o‘g‘irlagan ma’lumotlarini sotadigan saytda O‘zbekiston Kiberxavfsizlik markazining 100 nafar xodimiga tegishli shaxsiy ma’lumotlar e’lon qilindi.
Noma’lum xaker ma’lumotlarni markazning ichki bazasidan olganini, uning qo‘lida bundan ham muhimroq ma’lumotlar borligini aytgan. Ularning e’lon qilinishini to‘xtatish evaziga 200 000 ming dollar talab qilgan.
Ushbu holat yuzasidan Kiberxavfsizlik markazi rasmiy munosabat bildirdi.
Qayd etilishicha, o‘tkazilgan dastlabki o‘rganishlar natijasiga ko‘ra, mazkur tarqatilayotgan ma’lumotlar haqiqatga mos kelmaydi va markaz ichki axborot tizimlari buzilmagan va bunday turdagi ma’lumotlar bazasidan foydalanilmaydi.
Shuningdek, markaz xabarida “Axborotlashtirish to‘g‘risida”gi qonunning 12-1 moddasi 2-qismi eslatib o‘tilgan.
Qonunga muvofiq, veb-saytning yoki internet sahifasining egasi, shu jumladan bloger hamma erkin foydalanishi mumkin bo‘lgan axborot joylashtiriladigan Internet jahon axborot tarmog‘idagi o‘z veb-saytiga yoki internet sahifasiga hamma erkin foydalanishi mumkin bo‘lgan axborotni joylashtirishdan avval uning to‘g‘riligini tekshirishi, shuningdek, joylashtirilgan axborotning noto‘g‘riligi aniqlangan taqdirda uni darhol o‘chirib tashlashi shart.
Avval ham 2026-yil fevralda hukumat tizimlaridan kamida 15 million O‘zbekiston fuqarosining shaxsiy ma’lumotlari sizdirilib, Dark Web’ga joylashtirilgani haqida xabar berilgandi. Holat yuzasidan Kiberxavfsizlik markazi DUK o‘rganishlar olib borilayotganini va keyinroq qo‘shimcha ma’lumot taqdim etilishini ma’lum qilgan.
O‘sha paytda Raqamli texnologiyalar vaziri Sherzod Shermatov 15 million fuqaroning ma’lumoti internetda sotilish holati yo‘qligini aytgan.
