Sirdaryoda pora sifatida tilla taqinchoq olgan soliqchi ushlandi
U zargarlik buyumlari sotadigan MCHJga sun’iy jarima shakllantirib, uni bekor qilish evaziga pora talab qilgan.
Sirdaryo viloyatida soliq organi mansabdor xodimi pora olish holatida qo‘lga olindi. Bu haqda DXX xabar berdi.
Ma’lum qilinishicha, viloyat Soliq boshqarmasining sho‘ba boshlig‘i xizmat mavqeidan foydalangan holda, zargarlik buyumlari savdosi bilan shug‘ullanuvchi MCHJ go‘yoki 1 mlrd so‘mdan yuqori savdo aylanmasini yashirib, majburiy to‘lovdan bo‘yin tovlagani vaji bilan, unga nisbatan sun’iy shakllantirilgan 145 mln so‘m jarimani qo‘llamaslik va kelgusi faoliyatida rahnamolik qilish evaziga uning rahbaridan qiymati 10 mln so‘mlik tilla taqinchoqni olgan vaqtida ashyoviy dalillar bilan ushlandi.
Hozirda unga nisbatan jinoyat ishi qo‘zg‘atilib, tergov harakatlari olib borilmoqda.
