Suv tejaydigan sug‘orish tizimlari uchun 50 foizgacha subsidiya ajratiladi
Mazkur subsidiya mahsulot va texnologiya turidan qat’i nazar har bir kontur uchun faqat bir marta beriladi.
Hukumatning 2026-yil 28-apreldagi 206-son qarori bilan “Qishloq xo‘jaligi mahsulotlarini yetishtiruvchilarning suvni tejaydigan sug‘orish texnologiyalarini joriy etish bo‘yicha xarajatlarining bir qismini qoplash tartibi to‘g‘risida”gi nizom tasdiqlandi. Bu haqda Adliya vazirligi xabar berdi.
Unga muvofiq, qishloq xo‘jaligi mahsulotlarini yetishtiruvchilarga suvni tejaydigan sug‘orish texnologiyalarini joriy etish bilan bog‘liq xarajatlar uchun davlat byudjetidan subsidiya ajratiladi. Mazkur subsidiya har bir kontur uchun faqat bir marotaba, mahsulot turi va texnologiya turidan qat’i nazar taqdim etiladi.
Subsidiya olish uchun talabgorlar o‘zlariga tegishli ekin yer maydonlari haqidagi ma’lumotlarni konturlar va qishloq xo‘jaligi mahsulotlari turlari kesimida belgilangan tartibda Agroportal tizimiga kiritishi lozim. Shundan so‘ng, ariza elektron shaklda mazkur tizim orqali yuboriladi.
Arizaga suvni tejaydigan sug‘orish texnologiyasini qurish bo‘yicha “Tomchi-reestr”ga kiritilgan pudrat tashkiloti bilan tuzilgan shartnoma nusxasi, loyiha hujjatlari hamda ishlar yakunlanganini tasdiqlovchi dalolatnoma, shuningdek amalga oshirilgan ishlar bo‘yicha kontur ma’lumotlari (hududi va joylashuvi aniq ko‘rsatilgan holda) ilova qilinadi.
Shuningdek, suvni tejaydigan sug‘orish texnologiyalarini o‘z mablag‘i hisobidan joriy etgan talabgorlarga subsidiya miqdorining 50 foizi oldindan to‘lab berilishi belgilangan.
