Toshkentda profilaktika inspektorlari nogironligi bo‘lgan ayolni kaltaklagani rad etildi

Ijtimoiy tarmoqlarda profilaktika inspektorlari nogironligi bo‘lgan ayolni kaltaklagani haqida xabarlar tarqalgandi. Mazkur holat yuzasidan Toshkent shahar IIB rasmiy ma’lumot berdi.

 

Ma’lum bo‘lishicha, 1995-yilda tug‘ilgan Sh.Q. (nogironligi mavjud emas) 2025-yilning yanvar oyidan avgust oyiga qadar tanishi 1996-yilda tug‘ilgan X.M. bilan rasmiy nikohsiz Mirzo Ulug‘bek tumanida joylashgan uyda (X.M.ga tegishli xonadon) birga yashab kelgan. 

 

2025-yilning dekabr oyida fuqaro X.M. ushbu xonadonni 1999-yilda tug‘ilgan Z.S. ga ijaraga bergan. 10 dekabr kuni ushbu xonadonga Sh.Q. o‘zining onasi G.Q. va singlisi Z.Q. bilan birga kelib, ijarada yashayotgan fuqarolar bilan o‘zaro janjallashgan. Voqea joyiga hududiy profilaktika inspektorlari A.Xoliyorov va U.Xamidullayevlar kelib, ushbu janjalni to‘xtatishga harakat qilgan. Shu jarayonda Sh.Q. xonadonga kirish eshigi oldiga yotib olib, xonadondan ketmasligini ma’lum qilib janjal qilgan. Ushbu janjalga Z.S.ning otasi S.S. ham aralashgan va G.Q. yengil darajadagi jarohat olgan.

 

Xabarga ko‘ra, mazkur holat yuzasidan fuqarolar Sh.Q., G.Q., Z.Q. larga nisbatan O‘zbekiston Respublikasi Ma’muriy javobgarlik to‘g‘risidagi kodeksining 183-moddasi, 194-moddasi bilan, Z.S.ga 183-modda bilan, S.S.ga 52-modda asosida ma’muriy bayonnoma rasmiylashtirilib, to‘plangan hujjatlar jinoyat ishlari bo‘yicha Mirzo Ulug‘bek tumani sudiga taqdim etilgan. 

 

Biroq, Sh.Q., G.Q., Z.Q. lar bir necha marotaba sudga chaqirilgan bo‘lsa-da sudga kelmaganligi aniqlangan.