Chirchiqda jinoiy guruh rahbaridan pora olgan inspektor ushlandi
U jinoiy guruhning ishini “bosdi-bosdi” qilib bermoqchi bo‘lgan.
Toshkent viloyati Chirchiq shahar Ichki ishlar boshqarmasi profilaktika inspektori pora bilan ushlandi. Bu haqda DXX xabar berdi.
Ma’lum qilinishicha, profilaktika inspektori joriy yil fevral oyida I.Saidov yetakchiligidagi jinoiy guruh tomonidan boshqa bir fuqaroga yetkazilgan tan jarohati bo‘yicha holatni “bosdi-bosdi” qilib berish evaziga undan olgan 2700 AQSH dollaridan muqaddam 1000 dollarini jabrlanuvchiga bergan.
Avvalroq ushbu jinoiy guruh a’zolari qo‘lga olingani haqida xabar berilgandi.
Davlat xavfsizlik xizmatining Toshkent viloyati bo‘yicha boshqarmasi xodimlari tomonidan o‘tkazilgan tezkor tadbirda, profilaktika inspektori jabrlanuvchiga 300 AQSH dollari bergan vaqtida ashyoviy dalillar bilan ushlandi.
Hozirda unga nisbatan jinoyat ishi qo‘zg‘atilib, tergov harakatlari olib borilmoqda.
Shuningdek, profilaktika inspektorining mazkur noqonuniy harakatiga aloqador bo‘lgan hamkasbini ham jinoyat ishiga jalb qilish choralari ko‘rilmoqda.
