O‘zbekistonda podyezd va trotuarlar oldiga mashina qo‘yish taqiqlandi
Ko‘p qavatli uylar hududida yangi taqiqlar joriy etildi.
Ko‘p kvartirali uylar hududida xavfsizlik, tartib-intizom va umumiy foydalanish joylarini saqlashni ta’minlash maqsadida yangi talab va taqiqlar joriy etildi. Bu haqda Adliya vazirligi ma’lum qildi.
Unga ko‘ra, ko‘p kvartirali uylar va ularga tutash hududlarda fuqarolar tomonidan ayrim harakatlarni amalga oshirish qat’iyan taqiqlanadi.
Xususan, uy hayvonlarini umumiy foydalanishdagi zinalar, podyezdlar, tom, yerto‘la, umumiy foydalanishdagi oshxona hamda balkon va lodjiyalarda saqlashga ruxsat etilmaydi.
Shuningdek, balkon va lodjiyalarda yong‘in xavfini keltirib chiqaruvchi jihozlar o‘rnatish, og‘ir buyumlarni saqlash hamda fasad qismida kiyim-kechak, gilam va boshqa buyumlarni osib qo‘yish taqiqlanadi.
Bundan tashqari, kirish yo‘laklari va zinalar ostida yonuvchan materiallarni saqlash, umumiy issiqlik tizimlariga o‘zboshimchalik bilan o‘zgartirish kiritish, qo‘shimcha isitish moslamalarini ulash ham qat’iyan man etiladi.
Yana bir muhim tartibga ko‘ra, ko‘p kvartirali uylar va ularga tutash hududlarda avtomototransport vositalarini gazonlar, xiyobonlar, bolalar maydonchalari, trotuarlar hamda kirish yo‘laklari oldiga qo‘yish taqiqlanadi.
