Toshkent—Xiva yo‘nalishidagi yangi tezyurar poyezd qatnovi 3-maydan yo‘lga qo‘yiladi
“Jaloliddin Manguberdi” elektropoyezdi haftasiga 3 kun qatnab, safar vaqti 7,5 soat atrofida bo‘ladi.
Toshkent—Xiva yo‘nalishida yangi “Jaloliddin Manguberdi” nomli yuqori tezlikdagi elektropoyezd qatnovi yo‘lga qo‘yilmoqda. Mazkur yo‘nalish bo‘yicha chipta narxi bir tomonga 780 ming so‘m etib belgilangan.
O‘zbekiston temir yo‘llari ma’lumotiga ko‘ra, poyezd Toshkent Markaziy vokzalidan soat 07:00 da jo‘nab, Xivaga 14:31 da yetib boradi. Xivadan Toshkentga qaytish reysi esa soat 07:20 da yo‘lga chiqib, 14:51 da poytaxtga yetib keladi.
Qatnovlar haftasiga uch kun amalga oshiriladi. Toshkentdan Xivaga poyezd seshanba, payshanba va shanba kunlari harakatlansa, Xivadan Toshkentga chorshanba, juma va yakshanba kunlari qatnaydi.
Yangi yo‘nalish bo‘yicha ilk qatnov 3-may kuni Toshkentdan, 4-may kuni esa Xivadan amalga oshiriladi. Yo‘lovchilar chiptalarni temir yo‘l kassalari orqali yoki elektron shaklda maxsus platforma orqali xarid qilishlari mumkin.
