Tramp Moskvada bo‘lib o‘tadigan G‘alaba paradiga taklif qilinmadi
Rossiya prezidenti matbuot kotibi AQSh prezidentining paradga taklif etilgani haqidagi xabarlarni rad etdi.
Rossiya prezidenti Vladimir Putin AQSh prezidenti Donald Trampni 9-may kuni Moskvada bo‘lib o‘tadigan G‘alaba paradiga taklif qilmagan. Bu haqda Rossiya prezidenti matbuot kotibi Dmitriy Peskov TASS'ga ma’lum qilgan.
“Yo‘q”, deya qisqa javob bergan Peskov tegishli savolga izoh berar ekan, Trampning paradga taklif etilgani haqidagi xabarlarni rad etgan.
Shu bilan birga, 29-aprel kuni Putin va Tramp o‘rtasida telefon orqali muloqot bo‘lib o‘tgan. Suhbat davomida Rossiya prezidenti G‘alaba kuni munosabati bilan vaqtinchalik sulh e’lon qilishga tayyorligini bildirgan. Rossiya prezidentining xalqaro ishlar bo‘yicha yordamchisi Yuriy Ushakovga ko‘ra, Tramp ushbu taklifni qo‘llab-quvvatlagan.
Dmitriy Peskov, shuningdek, Kiyevning G‘alaba kunigacha sulh masalasiga munosabati shart emasligini ham qayd etgan.
