Ugom daryosi davlat gidrologik tabiiy yodgorligiga aylantiriladi
Ugom daryosi va uning havzasida bioxilma-xillikni asrash, suv resurslarini muhofaza qilish bo‘yicha yangi master-reja ishlab chiqilishi rejalashtirilmoqda.
Prezident Shavkat Mirziyoyev 30-aprel kuni tabiatni muhofaza qilish, ekologik barqarorlikni ta’minlash, chiqindilarni boshqarish tizimini takomillashtirish hamda muhofaza etiladigan tabiiy hududlarni rivojlantirishga qaratilgan keng ko‘lamli takliflar taqdimoti bilan tanishdi.
Taqdimotda Ugom daryosining ekologik holatini tiklash masalasi ham ko‘rib chiqildi. Ta’kidlanishicha, daryo va uning havzasi Ugom-Chotqol milliy tabiat bogʻi tarkibidagi muhim ekologik hududlardan biri hisoblanadi. Bu yerda oʻnlab noyob oʻsimlik va hayvonot turlari, shu jumladan, Qizil kitobga kiritilgan turlar mavjud. Daryo Chirchiq havzasining suv taʼminotida ham muhim oʻrin tutadi. So‘nggi yillarda daryoda suv sarfi kamayib, ekologik muvozanatga salbiy ta’sir kuchaygan. Bu holat qirgʻoqlarning yemirilishi, fauna va oʻsimlik dunyosiga salbiy taʼsir koʻrsatishi, bioxilma-xillik qisqarishi xavfini oshirmoqda.
Shu bois, Ugom daryosi va unga tutash hududlarni davlat gidrologik tabiat yodgorligi sifatida e’lon qilish, suvni muhofaza qilish zonalarida qurilish va xo‘jalik faoliyatini cheklash, shuningdek, “Ugom daryosi ekotizimini yaxshilash” bo‘yicha maxsus master-reja ishlab chiqish taklif etildi. Bundan tashqari, hududda daraxtzorlar barpo etish va ekologik monitoringni kuchaytirish vazifalari belgilandi.
