Pentagon yolg'on ma'lumot bermoqda — Abbos Aroqchi
Eron TIV AQShning Eronga qarshi urush xarajatlarini 100 mlrd dollar deb baholadi.
Eron tashqi ishlar vaziri Abbos Aroqchi Qo‘shma Shtatlarning Eronga qarshi harbiy operatsiyalarga sarflagan mablag‘lari haqidagi rasmiy ma’lumotlarni tanqid qildi. Uning ta’kidlashicha, Pentagon e’lon qilgan ko‘rsatkichlardan farqli ravishda, ushbu xarajatlar qariyb 100 milliard dollarni tashkil etgan.
Vazir ijtimoiy tarmoqlardagi bayonotida AQSh hukumati real xarajatlarni kamaytirib ko‘rsatayotganini bildirib, Isroil Bosh vaziri Benyamin Netanyaxu siyosatini keskin tanqid qilgan. Uning fikricha, mazkur harbiy harakatlar AQSh uchun kutilganidan ancha qimmatga tushgan.
Aroqchi, shuningdek, bilvosita iqtisodiy yo‘qotishlar bundan ham yuqori ekanini qayd etib, har bir amerikalik oila uchun o‘rtacha qo‘shimcha xarajat oyiga 500 dollarga yetayotganini ta’kidlagan.
Shu bilan birga, AQSh rasmiylari tomonidan ilgari surilgan ma’lumotlarga ko‘ra, harbiy operatsiyalarga dastlabki hisob-kitob asosida taxminan 25 milliard dollar sarflangan. Bu haqda AQSh Moliya vazirligining harbiy kotibi vazifasini bajaruvchi Jyul Xerst ma’lum qilgan.
Eslatib o‘tamiz, AQSh va Isroil tomonidan Eronga qarshi harbiy harakatlar 28-fevral kuni boshlangan. Keyinchalik Donald Tramp ikki haftalik sulh e’lon qilgan bo‘lsa-da, tomonlar o‘rtasida uzoq muddatli kelishuvga erishilmagan.
