Farmatsevtika va bank sektori: moslashuvchan moliyaviy yechimlar muhokamada
Mazkur muloqot banklar uchun sifatli portfelni kengaytirish, tadbirkorlar uchun esa biznesni rivojlantirishga mos moliyaviy imkoniyatlarni ochadi.
Markaziy bank raisi Timur Ishmetov, Farmatsevtika tarmog‘ini rivojlantirish agentligi direktori Abdulla Azizov hamda bank sektori va farmatsevtika sohasi vakillari ishtirokida uchrashuv bo‘lib o‘tmoqda.
Unda farmatsevtika korxonalari uchun zarur moliyaviy mahsulotlarni aniqlash, banklar tomonidan sohaning real ehtiyojlarini chuqur o‘rganish va ularga mos amaliy yechimlar ishlab chiqish masalalari muhokama qilinmoqda.
Ta’kidlanganishicha, farmatsevtika sohasi standart emas, balki o‘ziga xos yondashuvni talab qiladi. Xususan, aylanma mablag‘larni moliyalashtirish, uskunalar lizingi, savdo moliyalashtiruvi, bank kafolatlari va valuta risklarini boshqarish kabi instrumentlar sohaning barqaror rivoji uchun muhim.
Qayd etilshicha, mazkur muloqot banklar uchun sifatli portfelni kengaytirish, tadbirkorlar uchun esa biznesni rivojlantirishga mos moliyaviy imkoniyatlarni ochadi. Natijada bu yondashuv ishlab chiqarish, bandlik, texnologik yangilanish va ichki bozor barqarorligini qo‘llab-quvvatlashga xizmat qiladi.
