Namanganda 24 maydan 12-iyulgacha 65-xalqaro gullar festivali o‘tkaziladi
Festival davomida Namangan 100 milliondan ortiq gul bilan bezatiladi.
Namangan shahrida 24-maydan 12-iyulga qadar an’anaviy Xalqaro gullar festivalining 65-mavsumi bo‘lib o‘tadi. Tadbir doirasida shahar keng ko‘lamli madaniy, sport va turizm dasturlari bilan mehmonlarni qabul qiladi.
Tashkilotchilar ma’lumotiga ko‘ra, festival davomida Namangan 100 milliondan ortiq gul bilan bezatiladi. Bu esa shaharning turistik jozibasini yanada oshirishi kutilmoqda.
Dasturga muvofiq, har kuni turli yo‘nalishlarda tadbirlar o‘tkaziladi. Jumladan, jahon va milliy estrada yulduzlari ishtirokida konsertlar, Fashion Week doirasidagi moda namoyishlari, xalqaro va mahalliy sport musobaqalari rejalashtirilgan.
Shuningdek, ilmiy-amaliy konferensiyalar, seminarlar, teatr spektakllari va sirk tomoshalari, xalqaro hunarmandchilik ko‘rgazmalari ham o‘rin olgan. Festival dasturidan kulgu kechalari, gastronomik tadbirlar, xususan “Dunyo taomlari Namanganda” gastronomik turizm tadbirlari joy olgan.
Bundan tashqari, “Lavanda sayli” hamda zamonaviy dron-shoular tashkil etilishi rejalashtirilgan.
Mutaxassislar fikricha, festival hududda turizmni rivojlantirish, madaniy almashinuvni kengaytirish va mahalliy iqtisodiy faollikni oshirishga xizmat qiladi.
