Toshkentda “podyezd”da giyohvandlik vositasi iste’mol qilingan erkak va ayol aniqlandi
Ular yo‘lakda odam yo‘qligidan foydalanib, giyohvandlik vositasini iste’mol qilgan va so‘ng voqea joyini tark etgan.
Ijtimoiy tarmoqlarda tarqalgan videoda ikki nafar shaxs ko‘p qavatli uy yo‘lagida shubhali harakatlar sodir etgani aks etib, jamoatchilik orasida muhokamalarga sabab bo‘ldi. Holat Toshkent shahri IIBB tomonidan o‘rganilib, voqea tafsilotlari aniqlandi.
Ma’lum qilinishicha, joriy yilning 29-aprel kuni soat taxminan 14:35 larda 1987-yilda tug‘ilgan A.I. hamda uning tanishi — 2001-yilda tug‘ilgan R.I. Olmazor tumani Sebzor dahasidagi ko‘p qavatli uy yo‘lagiga kirgan. Ular yo‘lakda odam yo‘qligidan foydalanib, giyohvandlik vositasini iste’mol qilgan va so‘ng voqea joyini tark etgan.
Mazkur holat yuzasidan Ichki ishlar organlari tomonidan tergovga qadar tekshiruv ishlari olib borilmoqda. Tekshiruv yakuniga ko‘ra qonuniy qaror qabul qilinadi.
Shu munosabat bilan fuqarolardan ko‘p qavatli uylarning kirish yo‘laklarini ochiq holda qoldirmaslik, shuningdek, shubhali shaxslarni ko‘rgan taqdirda zudlik bilan huquqni muhofaza qiluvchi organlarga murojaat qilish so‘raladi.
