Toshkent viloyatida o‘lik baliqlarni kanalga tashlagan kompaniya 92 mln so‘m jarimaga tortildi

 

Toshkent viloyatining Zangiota tumanida joylashgan baliqchilik xo‘jaligida sodir bo‘lgan ekologik holat yuzasidan tegishli organlar tomonidan tekshiruv o‘tkazildi. Bu haqda Ekologiya va iqlim o‘zgarishi bo‘yicha milliy qo‘mitaning Davlat atrof-muhitni nazorat qilish inspeksiyasi ma’lum qildi.

 

Ijtimoiy tarmoqlarda tarqalgan videolarda Achchisoy kanalida baliqlarning nobud bo‘layotgani aks etgan. Mazkur holat yuzasidan o‘tkazilgan tezkor o‘rganishlar natijasida voqea Zangiota tumani Ittifoqchi mahallasida joylashgan “Damachi Baliq” MChJga tegishli sun’iy suv havzasida yuzaga kelgani aniqlangan.

 

Mutaxassislar xulosasiga ko‘ra, suv sathining pasayishi va kislorod yetishmasligi oqibatida 200–300 gramm og‘irlikdagi baliqlar nobud bo‘lgan. Shundan so‘ng, o‘lik baliqlar xo‘jalik xodimi tomonidan Achchisoy kanaliga tashlab yuborilgan.

 

Shuningdek, xo‘jalik faoliyati natijasida hosil bo‘lgan oqava suvlar laboratoriya tahlilidan o‘tkazilganda, ekologik me’yorlardan sezilarli darajada oshib ketganligi aniqlangan. Jumladan, ammoniy azot miqdori me’yordan 1,7 baravar, nitrit azoti 1,95 baravar, quruq qoldiq 1,28 baravar va umumiy fosfor 1,8 baravar yuqori ekani qayd etilgan.

 

Mazkur holat oqava suvlarni yetarli darajada tozalamaslik, suv havzalarining ifloslanishi hamda ekologik muvozanatning buzilishiga olib kelishi mumkinligi ta’kidlangan.

 

Tekshiruv yakunlariga ko‘ra, korxonaga 92 million so‘mdan ortiq miqdorda kompensatsiya to‘lash majburiyati yuklatilgan. Mas’ul shaxslarga nisbatan ma’muriy bayonnomalar rasmiylashtirildi hamda bunday holatlarning takrorlanishining oldini olish bo‘yicha majburiy ko‘rsatmalar berilgan.

 

Shuningdek, Achchisoy kanali o‘lik baliqlardan tozalangan.