AQSh va Isroil hujumlari oqibatida Eronda 4000 dan ortiq tinch aholi halok bo‘lgan
Mojaro davomida 100 mingdan ortiq uy vayron qilingani va o‘n minglab odamlar jarohat olgan.
Abdul Majid Hakim Ilahi ma’lum qilishicha, AQSh va Isroil tomonidan Eronga qarshi amalga oshirilgan harbiy harakatlar oqibatida kamida 4000 nafar tinch aholi halok bo‘lgan. Bu haqda u jurnalistlarga bergan bayonotida ta’kidlagan.
Uning so‘zlariga ko‘ra, urush davomida tinch aholi yashaydigan hududlarga ham zarbalar berilgan. Natijada keng ko‘lamli vayronagarchilik yuzaga kelib, 100 mingdan ortiq turar joy binolari zarar ko‘rgan yoki butunlay vayron bo‘lgan. Shuningdek, 40 mingdan ziyod fuqaro turli darajadagi tan jarohatlari olgani qayd etilgan.
Vakilning bildirishicha, hujumlar davomida ijtimoiy va muhim infratuzilma obyektlari ham jiddiy talafot ko‘rgan. Xususan, 50 dan ortiq shifoxona va 25 ta oliy ta’lim muassasasiga zarar yetkazilgan.
Bundan tashqari, ayrim ta’lim muassasalari, jumladan, ikki marta qizlar boshlang'ich maktabiga hujum qilishgani va 175 nafar bola vafot etgani ta’kidlangan.
U shuningdek, ko‘priklar, jamoat joylari, ilmiy laboratoriyalar va boshqa muassasalar vayron qilinganini, bu esa mamlakat infratuzilmasiga sezilarli zarar yetkazganini qayd etgan.
Eslatib o‘tamiz, mazkur harbiy qarama-qarshilik joriy yilning 28-fevral kuni boshlangan. AQSh va Isroil tomonidan Eronga qarshi zarbalar berilganidan so‘ng, Eron tomoni ham javob choralarini ko‘rgan. Natijada mintaqada keskinlik kuchayib, keng ko‘lamli harbiy to‘qnashuvlar yuzaga kelgan.
