Eron urush oqibatida yetkazilgan zararni 270 mlrd dollarga baholamoqda
Dastlabki hisob-kitoblarga ko‘ra, zarar YIMning 60 foiziga teng.
Eron hukumati AQSh va Isroil bilan yuzaga kelgan harbiy qarama-qarshiliklar oqibatida mamlakat infratuzilmasiga yetkazilgan zarar miqdorini baholash jarayonini davom ettirmoqda. Bu haqda Eron hukumati vakili Fotima Muhajironiy Azad Iran telegram kanaliga ma'lum qilgan.
Ma’lum qilinishicha, taxminan 40 kun davom etgan harbiy harakatlar natijasida Eron infratuzilmasiga yetkazilgan zarar dastlabki hisob-kitoblarga ko‘ra 270 milliard dollarni tashkil etmoqda. Mazkur raqam to‘g‘ridan-to‘g‘ri va bilvosita yo‘qotishlarni o‘z ichiga olgan bo‘lib, yakuniy emasligi ta’kidlangan.
Eron hukumati vakili Fotima Muhajironiy qayd etishicha, zarar ko‘lami yakuniy baholashlar natijasida yanada ortishi mumkin.
Tahlillarga ko‘ra, ushbu zarar mamlakat yalpi ichki mahsulotining qariyb 60 foiziga teng keladi. Ma’lumot uchun, Eronning YIM hajmi taxminan 450 milliard dollar atrofida baholanmoqda.
