Ohangaronda IIB xodimini pedofiliyada ayblagan yigit 7 sutkaga qamaldi
18 yoshli fuqaro ijtimoiy tarmoqlarda tarqatgan yolg‘on ma’lumoti uchun jazolandi.
Toshkent viloyati Ohangaron shahrida ichki ishlar organi xodimini asossiz ravishda pedofiliyada ayblab, yolg‘on axborot tarqatgan 18 yoshli fuqaro ma’muriy javobgarlikka tortildi. Bu haqda viloyat IIBB matbuot xizmati ma’lum qildi.
Qayd etilishicha, mazkur shaxs ijtimoiy tarmoqlarda video tarqatib, ichki ishlar xodimini voyaga yetmagan qizga nisbatan noqonuniy harakatlarda ayblagan.
Holat yuzasidan aniqlik kiritish maqsadida u ichki ishlar bo‘limiga chaqirilgan. Biroq fuqaro xodimlarning qonuniy talablariga bo‘ysunmasdan, bino hududida janjal ko‘targan.
O‘tkazilgan surishtiruvlar davomida fuqaro o‘zi tarqatgan ma’lumotlar haqiqatga to‘g‘ri kelmasligini tan olgan.
Sud qaroriga ko‘ra, ushbu shaxs hamda uning ikki nafar sherigiga nisbatan Ma’muriy javobgarlik to‘g‘risidagi kodeksning 183, 194 va 195-moddalari asosida 7 sutkadan ma’muriy qamoq jazosi tayinlandi.
Ma’lum qilinishicha, holat yuzasidan qo‘shimcha tergov harakatlari davom ettirilmoqda. Jumladan, ichki ishlar xodimini qasddan obro‘sizlantirish, internet orqali yolg‘on axborot tarqatish hamda transport vositasiga zarar yetkazish holatlari bo‘yicha tekshiruv olib borilmoqda.
