"Boysun bahori"da 300 kilogrammgacha go‘sht pishiriladigan tandir namoyish etildi

Surxondaryo viloyatining Boysun tumanida o‘tkazilayotgan "Boysun bahori" XIII xalqaro folklor festivali doirasida yana bir e’tiborga molik voqea qayd etildi. Festival mehmonlari uchun bunyod etilgan ulkan tandir o‘zining hajmi va imkoniyatlari bilan haqiqiy rekord natija sifatida e’tirof etilmoqda.

 

 

Bo‘yi 2 metrdan baland, eni qariyb 3,5 metrni tashkil etuvchi mazkur tandir bir hafta davomida mohir ustalar tomonidan katta mehnat va yuqori mahorat bilan bunyod etilgan. Qurilish jarayonida xavfsizlik, mustahkamlik hamda sifat masalalariga alohida e’tibor qaratilgan bo‘lib, tandir milliy an’analar va zamonaviy yondashuv uyg‘unligida barpo etilgan.

 

 

Ushbu yirik tandirning sig‘imi ham e’tiborga molikdir — uning ichida bir vaqtning o‘zida 10-15 ta qo‘zichoqni pishirish mumkin. Pishirish jarayonida ko‘mirdan emas, balki an’anaviy usul — o‘tin yoqish orqali yuqori harorat hosil qilinadi. Bu esa taomning o‘ziga xos ta’mi va xushbo‘yligini ta’minlaydi.

 

Mutaxassislarning ta’kidlashichaa, tandirda bir martalik pishirish uchun 250 kilogrammdan 300 kilogrammgacha go‘sht sarflanadi. Tayyorlangan tandir go‘shti esa festival davomida keng jamoatchilikka tortiq etiladi.

 

 

Eng e’tiborlisi, yetti kun davom etadigan festival mobaynida ushbu tandirda pishirilgan go‘sht xorijdan kelgan sayyohlar, mehmonlar hamda kam ta’minlangan oilalarga bepul tarqatilishi rejalashtirilgan. Bu esa nafaqat milliy taomlarimizni targ‘ib qilish, balki mehmondo‘stlik va saxovat an’analarini yana bir bor namoyon etadi.

 

"Boysun bahori" festivali shu tariqa nafaqat boy madaniy dasturlari, balki ana shunday noyob tashabbus va rekord natijalari bilan ham yodda qolmoqda.