Kommunal qarzlar endi yangi uy egasiga o‘tmaydimi?
Raqobat qo‘mitasi notarial shartnomalardan "eski qarzdorlikni yangi egasiga yuklash" haqidagi bandni olib tashlash tashabbusini ilgari surmoqda.
Raqobatni rivojlantirish va iste’molchilar huquqlarini himoya qilish qo‘mitasi ko‘chmas mulk oldi-sotdi jarayonlarida mavjud muhim muammoga e’tibor qaratdi. Xususan, ayrim holatlarda uy sotib olgan fuqarolardan avvalgi egaga tegishli bo‘lgan kommunal qarzlarni to‘lash talab qilinayotgani qayd etildi.
Qo‘mita ma’lumotiga ko‘ra, bunday amaliyot “Iste’molchilar huquqlarini himoya qilish to‘g‘risida”gi qonun talablariga zid bo‘lib, fuqarolarning huquqlarini cheklovchi shartlar hisoblanadi.
Shu munosabat bilan qo‘mita notarial tasdiqlangan ko‘chmas mulk oldi-sotdi shartnomalaridan “qarz aniqlansa, uni xaridor to‘laydi” mazmunidagi bandlarni chiqarib tashlashni taklif qildi.
Amaldagi tartibga ko‘ra, ko‘chmas mulk bitimlari NOTARIUS axborot tizimi orqali tekshiriladi va qarzdorlik mavjud bo‘lmagan taqdirdagina tasdiqlanadi. Shunga qaramay, ayrim hollarda billing tizimidagi xatoliklar yoki ma’lumotlarning o‘z vaqtida yangilanmasligi sababli muammolar yuzaga kelmoqda.
Misol sifatida Samarqand viloyatida kuzatilgan holatda, fuqaro uy sotib olgach, unga 13 million so‘mlik qarzdorlik yuklatilgan. Tekshiruv natijasida ushbu qarz avvalgi egaga tegishli ekani va tizimdagi xatolik sabab yuzaga kelgani aniqlanib, fuqaroning huquqlari tiklangan.
Qo‘mita bunday holatlarning oldini olish maqsadida tegishli vazirlik va idoralarga rasmiy takliflar yuborganini ma’lum qildi.
