Korrupsiyaga qarshi kurashda hokimlarning mas’uliyati oshiriladi
Endi hukumat a’zolari va hokimlikka nomzodlar korrupsiyaga qarshi aniq rejalar taqdim etishlari shart bo'ladi.
O‘zbekistonda korrupsiyaga qarshi kurash tizimini yanada takomillashtirish maqsadida joriy yil aprel oyida qabul qilingan O‘RQ-1142-sonli qonun bilan ayrim qonun hujjatlariga o‘zgartirish va qo‘shimchalar kiritildi.
Mazkur o‘zgartishlarga muvofiq, endilikda hukumat a’zolari hamda hokim lavozimlariga nomzodlar korrupsiyaga qarshi kurashish bo‘yicha aniq rejalarni ishlab chiqib, taqdim etishi shart bo‘ladi. Bu tartib “Mahalliy o‘zini o‘zi boshqarish to‘g‘risida”, “O‘zbekiston Respublikasi Oliy Majlisi Qonunchilik palatasining Reglamenti to‘g‘risida” hamda “O‘zbekiston Respublikasi Vazirlar Mahkamasi to‘g‘risida”gi qonunlarda mustahkamlab qo‘yildi.
Shuningdek, sud-huquq tizimida ham bir qator yangiliklar joriy etildi. Jumladan, fuqarolik va iqtisodiy ishlarni soddalashtirilgan tartibda ko‘rib chiqish uchun da’vo miqdori sezilarli darajada oshirildi. Endilikda bu mezon yuridik shaxslar uchun 150 BRV, yakka tartibdagi tadbirkorlar uchun 100 BRV va jismoniy shaxslar uchun 50 BRV etib belgilandi.
Bundan tashqari, investitsiya shartnomalari bo‘yicha majburiyatlarni bajarmagan subyektlarga nisbatan sudga murojaat qilishda maxsus iqtisodiy va sanoat zonalari direksiyalari davlat bojini to‘lashdan ozod etildi.
Mazkur hujjat Qonun hujjatlari milliy bazasida e’lon qilingan bo‘lib, 2026-yil 1-maydan kuchga kirdi.
