Rossiyaning 9-may kungi paradiga Ukraina dronlari uchib kelishi mumkin — Zelenskiy
Ukraina Prezidentiga ko‘ra, Moskvaning harbiy texnikasiz parad o‘tkazish rejasi ham aynan shu tahdidlar bilan bog‘liq bo‘lishi mumkin.
Volodimir Zelenskiy Rossiya 9-may kuni Moskvada o‘tkaziladigan parad vaqtida Qizil maydon ustidan Ukraina dronlari uchib o‘tishidan xavotirda ekanini bildirdi. Bu haqda "Interfaks" yozmoqda.
Ukraina Prezidenti bu haqda Yerevanda bo‘lib o‘tgan Yevropa siyosiy hamjamiyati sammitida so‘zladi. Zelenskiyning aytishicha, Rossiya 9-may paradini harbiy texnikasiz o‘tkazishni rejalashtirishi ham aynan shu xavotirlar bilan bog‘liq bo‘lishi mumkin.
“Agar shunday bo‘lsa, bu ko‘p yillardan beri birinchi marta ularning harbiy texnika chiqarishga qurbi yetmayotganini anglatadi. Ular Qizil maydon ustidan dronlar uchib o‘tishi mumkinligidan qo‘rqyapti. Bu juda ko‘p narsadan dalolat beradi va hozir ular kuchli emasligini ko‘rsatadi", — dedi Zelenskiy.
Uning fikricha, Rossiyaga bosimni sanksiyalar orqali davom ettirish va Ukrainani qo‘llab-quvvatlashni kuchaytirish zarur.
Shuningdek, Ukraina prezidenti Yevropa davlatlarini dronlarga qarshi mudofaa tizimlarini rivojlantirish bo‘yicha hamkorlikni kengaytirishga chaqirdi. Uning aytishicha, Yevropa havodagi, dengizdagi va quruqlikdagi tahdidlarga qarshi ishonchli himoya tizimiga ega bo‘lishi kerak.
Zelenskiy Yevropa muzokaralarda yagona pozitsiyaga ega bo‘lishi zarurligini ta’kidlab, AQSH bilan aloqalar davom etayotganini, biroq Rossiya bilan muzokaralarda Yevropa ham ishtirok etishi kerakligini bildirdi.
