O‘zbekistonda mahalliy turoperatorlarning xorijdagi targ‘ibot xarajatlarining bir qismi qoplanadi
Bunda xarajatlarning 25 foizigacha, biroq 500 million so‘mdan oshmagan qismi to‘lab beriladi.
O‘zbekistonda turizm sohasini rivojlantirish va sayyohlar uchun qulayliklarni oshirishga qaratilgan yangi moliyaviy mexanizmlar joriy etiladi. Bu haqda “Huquqiy axborot” Telegram-kanalida xabar berildi.
Qarorga ko‘ra, 2026-yil 1-sentyabrdan Turizmni qo‘llab-quvvatlash jamg‘armasi hisobidan Vazirlar Mahkamasi tomonidan belgilangan tartibda bir qator xarajatlar qisman qoplab beriladi.
Xususan, 2030-yil 31-dekabrga qadar O‘zbekistonga turistlarni jalb qilish maqsadida xorijiy davlatlardan taklif etiladigan turoperatorlar vakillarining transport, yashash va ovqatlanish xarajatlarining bir qismi to‘lanadi.
Shuningdek, mahalliy turoperatorlarning xorijiy sayyohlar oqimini oshirishga qaratilgan xorijdagi targ‘ibot tadbirlari xarajatlarining 25 foizigacha, biroq 500 million so‘mdan oshmagan qismi qoplab beriladi.
Qarorga muvofiq, xususiy tadbirkorlarning sayyohlar uchun madaniy-ommaviy va konsert-tomosha hamda madaniy tadbirlarni aniq belgilangan hudud va jadval asosida yo‘lga qo‘yish bilan bog‘liq xarajatlarini 1-yilgacha muayyan qismini moliyalashtirish tartibi joriy etiladi.
Bunda tadbirkorlar tomonidan ushbu tadbirlarni tashkil etishni bosqichma-bosqich o‘zi qoplash sharti bilan moliyalashtirish chegarasi Turizmni qo‘llab-quvvatlash jamg‘armasi kengashi tomonidan belgilanadi.
