Putinga qarshi suiqasd ehtimoli tufayli uning xavfsizligi kuchaytirildi — Financial Times

Rossiya prezidenti Vladimir Putin xavfsizligi so‘nggi oylarda keskin kuchaytirildi. Bu haqda Financial Times'ga tayanib, BBC xabar berdi.

 

Ma’lum qilinishicha, Federal qo‘riqlash xizmati tomonidan davlat rahbari qo‘riqlanishi kuchaytirilgan. Manbalarning aytishicha, Putin ko‘proq vaqtni yerosti bunkerlarida o‘tkazmoqda. Uning izolyatsiyasi COVID-19 pandemiyasidan keyin yanada ortgan.

 

Nashrga ko‘ra, mart oyidan buyon Kremlda suiqasd yoki davlat to‘ntarishi xavfi, xususan dronlar orqali amalga oshirilishi mumkin bo‘lgan hujumlar bilan bog‘liq xavotirlar kuchaygan. Bunday xavotirlar 2025-yilda Ukraina dronlari Rossiya hududidagi harbiy obyektlarga hujum qilganidan so‘ng yanada ortgan.

 

Manbalarga ko‘ra, xavfsizlikka oid tashvishlar Venesuela rahbari Nikolas Maduro bilan bog‘liq holatlardan keyin ham ko'paygan. Shu fonda Putinning rasmiy tashriflari qisqartirilgan, u bilan shaxsan uchrashuv o‘tkazadigan shaxslar uchun tekshiruvlar kuchaytirilgan.

 

Shuningdek, maqolada Rossiya prezidenti va uning oilasi Moskva viloyati hamda Valdaydagi rezidensiyalariga tashriflarni kamaytirgani, davlat OAV esa vaziyatni barqaror ko‘rsatish uchun oldindan yozib olingan materiallardan foydalanayotgani qayd etilgan. Biroq BBC ushbu da’volarni mustaqil tasdiqlay olmasligini bildirgan.

 

FT yozishicha, prezident atrofidagi xodimlarga jamoat transporti va mobil qurilmalardan foydalanish bo‘yicha qat’iy cheklovlar joriy etilgan, ularning uylariga esa kuzatuv tizimlari o‘rnatilgan.

 

Nashr Moskvada internetning vaqtincha o‘chirilishi ham qisman xavfsizlik choralari bilan bog‘liq bo‘lishi mumkinligini ta’kidlaydi. Shu bilan birga, kuch tuzilmalari o‘rtasida xavfsizlikni ta’minlash masalasida o‘zaro ayblovlar ham yuzaga kelgani aytilmoqda.

 

Manbalarga ko‘ra, Putin hozirgi kunda o‘z vaqtining katta qismini urushni boshqarishga sarflamoqda, ichki siyosat masalalari esa ikkinchi darajaga tushgan.