Xalqaro qidiruvdagi uch nafar o'zbekistonik BAAdan ekstraditsiya qilindi
Ulardan ikki nafari firibgarlik, yana biri odam savdosi bilan bog'liq jinoyatda ayblanmoqda.
Interpolning Oʻzbekistondagi Milliy markaziy byurosi tomonidan olib borilgan samarali hamkorlik va tezkor chora-tadbirlar natijasida xalqaro qidiruvda boʻlgan uch nafar shaxs chet el hududida qoʻlga olinib, Oʻzbekistonga qaytarildi. Bu haqda IIV ma'lum qildi.
Maʼlumotlarga koʻra, mazkur shaxslardan ikki nafari firibgarlik, yana biri esa odam savdosi jinoyatini sodir etganlikda ayblanmoqda. Jinoyatlardan soʻng ular Birlashgan Arab Amirliklariga yashiringan.
Interpolning Toshkent va Abu-Dabidagi Milliy markaziy byurolari oʻrtasidagi hamkorlik hamda xalqaro qidiruv mexanizmlarining samarali ishga solinishi natijasida ularning aniq joylashuvi aniqlangan.
Amalga oshirilgan maxsus operatsiya doirasida uchala shaxs ham Interpolning Abu-Dabidagi byurosi koʻmagida qoʻlga olinib, belgilangan tartibda Oʻzbekistonga ekstraditsiya qilingan.
Ular Islom Karimov nomidagi Toshkent xalqaro aeroportiga Interpol Milliy markaziy byurosi xodimlari hamrohligida olib kelingan va qonunchilikka muvofiq javobgarlikka tortish jarayonlari boshlangan.
Qayd etilishicha, chet elga yashirinish javobgarlikdan ozod etmaydi.
