O‘zbekistonda kartalar o‘rtasida komissiyasiz o‘tkazmalar joriy etilishi mumkin
Bank kartalari orqali amalga oshiriladigan operatsiyalarda SMS-xabarnomalar xarajatlari qayta ko‘rib chiqiladi.
Prezident Shavkat Mirziyoyev ishlab chiqarish korxonalarining barqarorligini ta’minlash hamda tadbirkorlar duch kelayotgan muammolarni hal etishga qaratilgan taqdimot bilan tanishdi. Unda raqamlashtirish va naqd pulsiz to‘lovlarni kengaytirish masalalariga alohida e’tibor qaratildi.
Ta’kidlanishicha, so‘nggi yillarda tovar va xizmatlar uchun to‘lovlar tobora ko‘proq naqd pulsiz shaklga o‘tmoqda. Shu bois aholi va biznes uchun bunday to‘lovlarni yanada qulaylashtirish zarurligi qayd etildi. Bu borada bank infratuzilmasini rivojlantirish, komissiya tizimini takomillashtirish va rag‘batlantiruvchi mexanizmlarni kengaytirish taklif qilindi.
Xususan, jismoniy shaxslarning oʻz bank kartalari oʻrtasidagi pul oʻtkazmalarini komissiyasiz amalga oshirish, naqdsiz toʻlovlarni aholi uchun qulay boʻlgan shakllarini koʻpaytirish, umumiy ovqatlanish, alkogol, tamaki va yoqilgʻi sotish sohalarida xarid cheki boʻyicha hisoblangan keshbekni tezkor qaytarish imkoniyatini yaratish taklif etildi.
Bank operatsiyalari xavfsizligini oshirish maqsadida joriy etilgan firibgarlikka qarshi tizim doirasida SMS-xabarnomalar bilan bog‘liq xarajatlarni qayta ko‘rib chiqish, ularning o‘rniga mobil ilovalar orqali bildirishnomalar yuborish yoki biometrik identifikatsiya kabi muqobil yechimlarni joriy etish imkoniyatlari ham muhokama qilindi.
Bundan tashqari, soliq ma’muriyatchiligini takomillashtirish, jumladan, soliq imtiyozlarini qo‘llashda yuzaga keladigan bahsli holatlarni bartaraf etish, soliq qarzlari bo‘yicha jarimalarning asosiy qarz miqdoridan oshmasligi prinsipini joriy etish taklif qilindi.
Tadbirkorlik faoliyatini qo‘llab-quvvatlash doirasida import jarayonlarini soddalashtirish, ortiqcha hujjatlarni qisqartirish, xorijda savdo uylari va vakolatxonalar ochish tartibini yengillashtirish hamda milliy mahsulotlarni xalqaro bozorlarda targ‘ib qilish mexanizmlarini kengaytirish masalalari ham ko‘rib chiqildi.
Davlat rahbari tadbirkorlik yo‘lidagi ortiqcha to‘siqlarni kamaytirish, nazorat va tartibga solish mexanizmlarini soddalashtirish hamda raqamlashtirish jarayonlarini biznes uchun qulaylik yaratadigan samarali vositaga aylantirish muhimligini ta’kidladi.
